Aktualitet

Hodhën kapsolla dhe molotovë në protestën e opozitës/ Arrestohen katër persona, procedohen 6 të tjerë (EMRAT)

Ata akuzohen se gjatë protestës ushtruan veprime të dhunshme dhe hodhën kapsolla, flakadanë dhe molotov në drejtim të policisë dhe Kryeministrisë. 

21 Shkurt 2024, 09:41 Nga r.ll
Hodhën kapsolla dhe molotovë në protestën e opozitës/
foto nga protesta

TIRANË- Katër persona janë arrestuar pas protestës së zhvilluar ditën e djeshme nga opozita para Kryeministrisë. Sipas njoftimit të policisë janë prceduar edhe gjashtë persona të tjerë. Personat e arrestuar janë Kindi Toli, Andrea Malia, Bledar Kola dhe Ismet Stefanis.

Ata akuzohen se gjatë protestës ushtruan veprime të dhunshme dhe hodhën kapsolla, flakadanë dhe molotov në drejtim të policisë dhe Kryeministrisë. 

Në cilësinë e provës materiale, policia ka sekuestruar 21 flakadanë të plasur; 1 bidon plastik 0.5 L, e mbushur me lëndë djegëse të dyshuar benzinë, me kapsollë të paplasur; 37 bidona plastikë uji, 0.5 L; 6 bidona plastikë të djegur, me aromë lënde djegëse benzinë; 3 kapsolla. Gjithashtu janë sekuestruar edhe 110 kapsolla që iu gjetën personave të arrestuar. 

NJOFTIMI I POLICISË:

Ushtruan veprime të dhunshme gjatë protestës së ditës së djeshme, duke hedhur lëndë piroteknike (kapsolla, flakadanë, molotov), në drejtim të punonjësve të Policisë dhe të një insitucioni shtetëror, arrestohen në flagrancë 4 shtetas dhe procedohen penalisht në gjendje të lirë 6 të tjerë.

Strukturat e Komisariatit të Policisë Nr. 1, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në përfundim të veprimeve të para hetimore të kryera në lidhje me aktet e dhunës, gjatë protestës së zhvilluar ditën e djeshme, më datë 20.02.2024, bazuar në provat e grumbulluara, arrestuan në flagrancë shtetasit:

- K. T., 21 vjeç, A. M., 18 vjeç, B. K., 37 vjeç, dhe I. S., 33 vjeç.

Në vijim të veprimeve u proceduan penalisht në gjendje të lirë shtetasit:

- A. I., 20 vjeç, R. Sh., 20 vjeç, M. M., 20 vjeç, M. S., 19 vjeç, G. P., 22 vjeç, dhe D. Th., 21 vjeç.

Gjatë këqyrjes së vendit të ngjarjes u sekuestruan në cilësinë e provës materiale:

- 21 flakadanë të plasur;
- 1 bidon plastik 0.5 L, e mbushur me lëndë djegëse të dyshuar benzinë, me kapsollë të paplasur;
- 37 bidona plastikë uji, 0.5 L;
- 6 bidona plastikë të djegur, me aromë lënde djegëse benzinë;
- 3 kapsolla.

Gjithashtu, janë sekuestruar në cilësinë e provës materiale 110 kapsolla, që iu gjetën këtyre shtetasve, gjatë kontrolleve fizike.

Strukturat hetimore të Drejtorisë Vendore të Policisë Tiranë, nën drejtimin e Prokurorisë, vijojnë punën për identifikimin dhe kapjen e personave të tjerë të përfshirë në akte të kundërligjshme gjatë protesës së ditës së djeshme.

Materialet i kaluan Prokurorisë pra Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.

policia e tiranes protesta e opozitës 20 shkurt 2024

Sondazh

Poll

MË SHUMË