Bota

Pse gjermanët po protestojnë kundër ekstremit të djathtë?

Protestat nisën pas një raporti se disa zyrtarë të lartë të partisë AfD diskutuan politika të tilla si dëbimi masiv i qytetarëve me origjinë të huaj në një takim me radikalët e krahut të djathtë në Potsdam.

25 Janar 2024, 15:21 Nga M.B
Pse gjermanët po protestojnë kundër ekstremit të
Foto ilustruese

BERLIN– Mijëra gjermanë kanë demonstruar kundër ekstremizmit të krahut të djathtë dhe Alternativës nacionaliste për Gjermaninë (AfD) në valën më të madhe të protestave në vend prej vitesh. Protestat nisën pas një raporti se disa zyrtarë të lartë të partisë AfD diskutuan politika të tilla si dëbimi masiv i qytetarëve me origjinë të huaj në një takim me radikalët e krahut të djathtë në Potsdam. Propozimet që "qytetarët e paasimiluar" të deportohen në "një shtet model në Afrikën e Veriut", të raportuara nga media Correctiv, tmerruan shumë gjermanë. Disa i kanë krahasuar propozimet me planin fillestar të nazistëve për të dëbuar hebrenjtë evropianë në Madagaskar dhe takimin me konferencën e 1942 të Wannsee, afër Potsdamit, ku zyrtarët nazist komplotuan Holokaustin, raporton Reuters. Shumë thonë se nuk mund të qëndrojnë më të heshtur për ngritjen e partisë më të suksesshme të ekstremit të djathtë në Gjermani që nga nazistët.

Protestat kanë përkuar gjithashtu me deklaratat e drejtuesve të biznesit që kanë frikë nga ndikimi i rritjes së ekstremit të djathtë në imazhin dhe atraktivitetin e Gjermanisë për investitorët dhe krahun e huaj të kualifikuar. Grupet dhe aleancat e shoqërisë civile së bashku me partitë kryesore, sindikatat dhe kishat, me emra si "Së bashku kundër së djathtës", "Këlni ngrihet në këmbë" ose "Jeto Demokraci", janë kryesisht prapa protestave. Sipas "Së bashku kundër së djathtës", protesta janë planifikuar në rreth 160 qytete gjatë javëve të ardhshme.

AfD nga ana tjetër, ka kërkuar të distancohet nga propozimi i dëbimit, duke thënë se nuk është politikë partiake. Bashkë-udhëheqësja Alice Weidel ndau rrugët me një këshilltar që ndoqi bisedimet në Potsdam.
Por raporti vuri në pah pikat ekstremiste në AfD për të cilat agjencitë e inteligjencës kanë paralajmëruar prej kohësh. Partia është nën mbikëqyrjen e qeverisë nën dyshimin për ekstremizëm. Drejtuesit e AfD-së kanë kërkuar gjithashtu të minimizojnë protestat, duke thënë se imazhet janë manipuluar dhe tubimet janë një përpjekje e qeverisë për të shkëputur vëmendjen nga dështimet e saj. Protestuesit po kërkojnë të frenojnë mbështetjen për AfD, e cila është në vend të dytë kombëtar dhe e para në tre shtetet lindore të Gjermanisë që mbajnë zgjedhje këtë vit. Në përgjithësi, protestuesit thonë se po kërkojnë të zgjojnë shoqërinë në mënyrë që ajo të pranojë rrezikun që përfaqëson AfD.

gjermania protesta

Sondazh

Poll

MË SHUMË