Bota

Blinken vijon takimet në Lindjen e Mesme/ Jordania: Stabiliteti në rajon vjen me fundin e luftës në Gazë

Ai tha se stabiliteti rajonal mund të arrihet vetëm përmes një zgjidhjeje të drejtë të çështjes palestineze dhe një paqeje gjithëpërfshirëse të bazuar në zgjidhjen me dy shtete.

7 Janar 2024, 19:54 Nga A.TH
Blinken vijon takimet në Lindjen e Mesme/ Jordania: Stabiliteti në
Antony Blinken

SHBA- Sekretari amerikan i Shtetit, Antony Blinken vijoi turin e takimeve në kuadër të përpjekjeve për të parandaluar përshkallëzimin e konfliktit mes Izraelit dhe Libanit. Blinken u ndal në Jordani ku zhvilloi një takim me Mbretin Abdullah II.

Sipas raportimit të mediave të huaja, Mbreti Abdullah II i Jordanisë paralajmëroi Sekretarin Amerikan të Shtetit Antony Blinken për pasojat katastrofike të luftës së vazhdueshme në Gaza dhe bëri thirrje për fundin e krizës së tmerrshme humanitare në enklavë. Mbreti Abdullah II përsëriti rëndësinë e rolit të SHBA në ushtrimin e presionit për një armëpushim të menjëhershëm në Gaza dhe sigurimin e shpërndarjes së ndihmave humanitare. Ai tha se stabiliteti rajonal mund të arrihet vetëm përmes një zgjidhjeje të drejtë të çështjes palestineze dhe një paqeje gjithëpërfshirëse të bazuar në zgjidhjen me dy shtete.

Në një deklaratë, zëdhënësi i Departamentit të Shtetit të SHBA-së, Matthew Miller, falënderoi Mbretin për rolin dhe udhëheqjen e Jordanisë në ofrimin e ndihmës shpëtimtare për civilët palestinezë në Gaza.

"Të dy ranë dakord të vazhdojnë koordinimin e ngushtë për ndihmën e qëndrueshme humanitare," thuhej në të. Në deklaratë thuhet se Blinken theksoi kundërshtimin e SHBA për zhvendosjen e palestinezëve nga Bregu Perëndimor dhe Gaza dhe nevojën për t'u siguruar civilëve mbrojtje nga dhuna.

Sekretari amerikan ndau në takim se SHBA-të janë të përkushtuara për të gjetur paqen dhe sigurinë si për izraelitët ashtu edhe për palestinezët, përmes krijimit të një shteti të pavarur palestinez. Nga Jordania, Blinken niset për në Katar ku do të takohet të dielën me Emirin e Katarit Tamim Bin Hamad Al Thani dhe kryeministrin dhe ministrin e Jashtëm Mohammed bin Abdulrahman Al-Thani.

lindja e mesme

Sondazh

Poll

MË SHUMË