Politike

Panairi i dytë i verës së “Open Balkan”/ Rama mungon, Vuçiç i gjen "zëvendësuesin" (FOTO)

Në panair mori pjesë presidenti i Malit të Zi, Jakov Milatoviç dhe kryeministri i Maqedonisë së Veriut, Dimitar Kovaçevski.

17 Nëntor 2023, 10:35 Nga r.ll
Panairi i dytë i verës së “Open Balkan”/ Rama mungon,
foto nga panairi

SERBI-Në panarin e dytë të verës në kuadër të "Open Balkan", është vënë re mungesa e kryeministrit të Shqipërisë, Edi Rama. Duket se presidenti i Serbisë, Aleksandër Vuçiç e ka gjetur një partner të ri për Ballkanin e Hapur, pasi Rama njoftoi largimin nga nisma. Por edhe pse nuk ishte i pranishëm fizikisht, kryeministri Rama kishte dërguar një video-mesazh në nisje të panairit. Rama tha se prania e presidentit të ri malazez Milatoviç në këtë event dëshmon natyrën konstruktive e gjithëpërfshirëse të kësaj iniciative,

“Miqtë e mi të dashur do të kisha dëshiruar që të isha me ju në këtë event ku veçanërisht dua që të falenderoj për praninë e tij presidentin e ri malazez. Prezenca e tij dëshmon natyrën konstruktive e gjithpërfshirëse të iniciativës sonë. Shtetet e rajonit duhet të ndërlidhen dhe në të ardhmen të ndërtojë marrëdhënie të mira fqinjësore në një vend ku të gjithë të jetojnë së bashku. Ne kemi mësuar se ndarjet e së kaluarës mund të pengojnë të tashmen dhe të ardhmen e Ballkanit Perëndimor.

Jam i bindur se e ardhmja jonë duhet të jetë e ndryshme nga e kaluara dhe e tashmja. Pyetja nuk është nëse, por kur. Unë jam i përkushtuar që të jap kontributin tim për këtë qëllim. Shtetet e Ballkanit Perëndimor janë krijuar për të ekzistuar krah për krah ndaj ky rajon duhet transformuar për gjeneratat e reja. Të nderlidhim vendet tona me botën, por të mos lidhemi me njëri-tjetrin është dritëshkurtër. Le të mësojmë nga gabimet e të tjerëve dhe të mos i përsërisim ato. Le të punojmë së bashku dhe ta kthejmë rajonin në një vend ku fëmijët tanë do të jetojnë së bashku.” tha Rama

Panairi i dytë i verës së “Open Balkan”/ Rama mungon,

Në panair mori pjesë presidenti i Malit të Zi, Jakov Milatoviç dhe kryeministri i Maqedonisë së Veriut, Dimitar Kovaçevski. Presidenti Vuçiç, në një bisedë me Milatoviç, para ceremonisë së hapjes së panairit, tha se në panair janë të pranishëm rreth 40 ekspozues nga Mali i Zi, që është një numër i madh për një vend të përmasave të tilla. Vuçiç theksoi se në Berlin nuk u pëlqen ajo që nuk mund ta menaxhojnë dhe se përkundër kësaj, atij i pëlqen shumë menaxhimi përmes “Open Ballkan”.

Çfarë ndodhi me nismën "Ballkani i Hapur"?

Kryeministri shqiptar, Edi Rama, deklaroi mbylljen e Ballkanit të Hapur, një nismë që hapi debate të forta në Shqipëri, por edhe përplasje në marrëdhëniet me Kosovën. Ai tha me 1 korrik se kjo nismë lindi për të çuar përpara Procesin e Berlinit, dhe sipas tij ky mision ishte kryer.

Nisma për bashkëpunimin rajonal “Ballkani i hapur”, e cila përfshinte Serbinë, Maqedoninë e Veriut dhe Shqipërinë, u mor nga presidenti i Serbisë, Aleksandër Vuçiç, kryeministri i Maqedonisë së Veriut asokohe, Zoran Zaev, dhe kryeministri i Shqipërisë, Edi Rama, në tetor të vitit 2019. Nisma fillimisht është quajtur “Mini Schengen” dhe parashikonte lëvizjen e lirë të kapitalit, mallrave, shërbimeve dhe njerëzve midis tri vendeve. Në korrik të vitit 2021, në Forumin për Bashkëpunim Ekonomik Rajonal në Shkup, nisma ka marrë emrin e ri, “Ballkani i hapur”. Kosova ka qenë kundër kësaj nisme që nga fillimi, ku kryeministri Albin Kurti ka thënë më herët se nisma “Ballkani i Hapur” më shumë i ngjan një “Ballkani të hapur për ndikimet nga Lindja”, sesa një nisme për treg të përbashkët rajonal.

edi rama aleksander vucic

Sondazh

Poll

MË SHUMË