Sport

Ukrainasja nuk i jep dorën bjelloruses në Wimbledon: “Të shtrëngoj duart? Vetëm kur trupat ruse të largohen nga Ukraina”…

Çdo ndeshje mes tenistëve ukrainas dhe rusë e bjellorusë sjell problemet e veta në Wimbledon.

10 Korrik 2023, 21:22 Nga DOSJA

Ukrainasja nuk i jep dorën bjelloruses në Wimbledon: “Të

ANGLI - Shumë bujë u ngrit pas ndeshjes mes Elina Svitolina dhe Victoria Azarenka në  Wimbledon. Në fund ukrainasja arriti të fitonte dhe të gjithë folën shumë më tepër për lëvizjen në fund të ndeshjes kur dy tenistet nuk u përshëndetën. Victoria Azarenka tha pas ndeshjes se nuk ka kuptim të flitet për këtë, ndërsa Svitolina theksoi se kjo fitore është shumë e rëndësishme për vendin e saj. 

"Po marr shumë mbështetje nga vendi im, kam marrë 60, 70 mesazhe menjëherë. Të gjithë po shikonin, brohoritnin, më jepnin video të tyre duke brohoritur për mua. Jam shumë krenare për atë që kam bërë. Kam luajtur keq dhe kjo më shtyu drejt fitores, e dija se duhej të luftoja”,- tha Svitolina pas ndeshjes.

Ajo shtoi gjithashtu se pas lindjes së fëmijës, ky është momenti më i lumtur në jetën e saj: “Kjo sepse e di se sa do të thoshte kjo ndeshje. Unë e di që njerëzit janë duke më shikuar në shtëpi dhe jam ndjerë përgjegjëse. Sa herë që luaj me teniste ruse dhe bjelloruse do të ketë më shumë presion për të fituar dhe për këtë arsye këto fitore kanë shumë vlerë për mua. Janë fitore të vogla për Ukrainë."

Dhe më pas ajo theksoi se është e zhgënjyer që duhet të luajë me teniste ruse dhe bjelloruse, ndryshe nga viti i kaluar kur ato u ndaluan të garojnë. "Vitin e kaluar u dërgua një mesazh i qartë nga Wimbledon, këtë vit ai ndryshoi për shkak të të gjitha llojeve të presioneve. E dija se do të më pyesnit këtë, por nuk mendoj se mbështetja ka ndryshuar," tha ajo.

Gazetarët e pyetën gjithashtu se çfarë mendonte për fishkëllimat që mori Victoria Azarenka, dy herë kampionja e Grand Slam-it, kur u largua nga fusha. 

“Kam marrë të njëjtin trajtim në Paris, të tria ndeshjet kanë qenë të tilla. Sot ndodhi. Për mua personalisht, mendoj se organizatorët e tenisit duhet të dalin dhe të thonë se nuk ka asnjë përshëndetje mes tenistëve rusë dhe bjellorusë me tenistët ukrainas. Nuk e di, ndoshta nuk është e qartë për njerëzit. Disa njerëz as nuk e dinë se çfarë po ndodh atje.

E kam thënë tashmë shumë herë, derisa ushtria ruse të largohet nga Ukraina dhe derisa ne të marrim territoret tona, nuk do të shtrëngojmë duart. Pozicioni im është i qartë," tha ajo, dhe kur u pyet nëse mendonte, se ishte e padrejtë ndaj rivalit të saj që mori fishkëllima, ajo vetëm tha: "Epo, kështu ishte edhe për mua në Paris. Nuk e di se cili do të ishte reagimi nëse do të kisha humbur, nuk mund t'i përgjigjem vërtet kësaj pyetjeje për ju. 

“Lavdi Ukrainës” u dëgjua nga tribuna dhe Svitolina shpjegoi se nga vinin ato thirrje.  "Ishin ukrainasit që ishin atje. Kam dëgjuar shumë ukrainas në audiencë dhe ishte vërtet diçka e veçantë, kjo ishte një nga atmosferat më të mira që kam luajtur",- përfundoi ajo. 

B.T (Dosja.al)

Sondazh

Poll

MË SHUMË