Bota

Tragjedia me 14 viktima/ Gjykata jep dënimin për dy drejtorët e spitalit që u përfshi nga zjarri në Tetovë

Sipas mbrojtjes, të akuzuarit nuk janë fajtorë sepse nuk kanë kontribuar në tragjedi, prandaj në seancën gjyqësore kërkuan lirimin e tyre.

5 Qershor 2023, 15:12 Nga f.i
Tragjedia me 14 viktima/ Gjykata jep dënimin për dy drejtorët e
pamje nga ngjarja

MAQEDONIA E VERIUT- Gjykata Themelore në Tetovë ka dënuar me nga 1 vit e gjysmë burgim me kusht dy drejtorët e spitalit në Tetovë lidhur me vdekjen e 14 personave nga një zjarr që kishte rënë në ndërtesë më 8 shtator 2021.

Drejtori i spitalit, Florin Besimi, dhe ish-drejtori ekonomik, Artan Etemi, nuk do ta vuajnë dënimin nëse brenda tre vjetëve nuk e përsërisin veprën. Grupi gjykues ka liruar ndërkohë mjekun Boban Vuçevski, i cili ngarkohej me veprën penale “mosrespektim i rregullave shëndetësore gjatë epidemisë”. Sipas mbrojtjes, të akuzuarit nuk janë fajtorë sepse nuk kanë kontribuar në tragjedi, prandaj në seancën gjyqësore kërkuan lirimin e tyre.

'Të akuzuarve Florim dhe Artan, iu caktohet dënimi me nga një vit e gjashtë muaj burg me kusht. Në pajtim me Nenin 49 dhe Nenin 50 të Kodit Penal, ata nuk duhet ta vuajnë nëse në afat prej tre vitesh nuk bëjnë vepër të re penale. Në pajtim me Nenin 96 Spitali Klinik i Tetovës dënohet me dënim me para në vlerë prej një milion denarë, që duhet ta paguaj 30 ditë pas sjelljes së vendimit”,- tha Jordan Velkovski, Kryetar i Trupit Gjykues.

Tragjedia e 8 shtatorit 2021 në spitalin e Tetovës u mori jetën 14 personave, 12 prej të cilëve ishin pacientë të prekur me COVID-19 që po trajtoheshin në këtë qendër dhe dy të tjerë familjarë të tyre. Spitali u dogj brenda pak minutash, sipas dëshmitarëve dhe shërbimeve zjarrfikëse.

maqedonia e veriut

Sondazh

Poll

MË SHUMË