Sport

Vllaznia e pathyeshme, shpallet kampione e Shqipërisë për femra për herë të 10-të...

Në ndeshjen e 18-të të kampionatit, Vllaznia mposhti 3-0 rivalen direkt për titull, Tiranën. Skuadra shkodrane e mbylli kampionatin në kuotën e 54 pikëve, pas 18 javëve të zhvilluara ku ka njohur vetëm fitore dhe asnjë barazim

22 Maj 2023, 19:44 Nga DOSJA
Vllaznia e pathyeshme, shpallet kampione e Shqipërisë për femra

TIRANE - Vllaznia është shpallur zyrtarisht kampione për edicionin futbollistik 2022-2023 në kampionatin e futbollit për femra. Kjo është hera e 10-të radhazi që vajzat shkodrane kurorëzohen me titullin e kampiones së Shqipërisë. Vllaznia e mbylli kampionatin në kuotën e 54 pikëve pas 18 javëve të zhvilluara, ku ka njohur vetëm fitore dhe asnjë barazim.

Në ndeshjen e 18-të të kampionatit, Vllaznia mposhti rivalen direkt për titull, Tiranën. Vajzat kuqeblu triumfuan me rezultatin 3-0, me gola të Megi Doçit, Matilda Gjergjit e Gresa Berishës.

Në fund të takimit, u zhvillua edhe ceremonia e dorëzimit të medaljeve për të gjithë pjesëtarët e Vllaznisë nga anëtari i Komitetit Ekzekutiv të FSHF-së, Bardhyl Jera, i cili gjithashtu i dorëzoi kapitenes së ekipit, Esmeralda Franja, edhe trofeun e kampiones.

Ndërkaq, sot u luajtën edhe ndeshjet e tjera të javës së 18-të, ku u fiksua përfundimisht edhe klasifikimi i skuadrave për këtë edicion futbollistik. Apolonia mposhti Kukësin në transfertë këtë të hënë me rezultatin 0-9, duke u renditur kështu përfundimisht në vendin e tretë në kampionat, me 42 pikë të grumbullulluara pas 18 javësh.

Në derbin e kryeqytetit, Partizani triumfoi ndaj Kinostudios në sfidën e zhvilluar të dielën në stadiumin ‘Arena e Demave’. Vajzat e kuqe fituan me rezultatin 4-1, në një ndeshje mjaft të luftuar nga të dyja ekipet.

Sakaq, Teuta mundi Lushnjen në stadiumin ‘Roza Haxhiu’ me shifrat 1-2, ndërsa Skënderbeu nuk ia doli ndaj Laçit në shtëpi. Laçjanet morën tre pikët e fundit të këtij edicioni në Korçë, duke fituar me rezultatin 5-0.

B.T (Dosja.al)

Sondazh

Poll

MË SHUMË