Bota

Borell është i shqetësuar për përshkallëzimin e tensioneve mes Shkupit dhe Sofjes: Ka deklarata të papranueshme nga disa politikanë

Borell theksoi se ai dënon sulmin në Ohër, siç bënë autoritetet në Shkup dhe shtoi se deklaratat e Qeverisë së Maqedonisë së Veriut e sigurojnë atë se përgjegjësit do të sillen para drejtësisë.

1 Shkurt 2023, 12:12 Nga I.A
Borell është i shqetësuar për përshkallëzimin e
Josep Borell

BRUKSEL- Shefi i Punëve të Jashtme të BE-së, Josep Borell, tha se ishte i shqetësuar për tensionet që kanë lindur midis Maqedonisë së Veriut dhe Bullgarisë dhe dënoi nxitjen e dhunës.

“Kohët e fundit kemi parë përshkallëzimin e tensioneve ndërmjet Maqedonisë së Veriut dhe Bullgarisë me incidente dhe provokime për të ardhur keq”, theksoi ai me rastin e takimit në Bruksel me Bujar Osmanin, ministrin e Punëve të Jashtme të Maqedonisë së Veriut.

Borell theksoi se ai dënon sulmin në Ohër, siç bënë autoritetet në Shkup dhe shtoi se deklaratat e Qeverisë së Maqedonisë së Veriut e sigurojnë atë se përgjegjësit do të sillen para drejtësisë.

Ai tha se ka deklarata të papranueshme nga disa politikanë nacionalistë, të cilat nxisin urrejtje e nënkuptojnë dhunë dhe se kjo vetëm mund të përshkallëzojë më tej tensionet dhe nuk kontribuon në një atmosferë që mundëson fqinjësi të mirë dhe marrëdhënie të mira.

Borel beson se duhet punë e përbashkët për të promovuar një atmosferë dialogu dhe respekti të ndërsjellë, sepse kjo është vendimtare në rrugën evropiane dhe është baza mbi të cilën është ndërtuar Bashkimi Evropian. Ai gjithashtu tha se ishte "i lumtur" kur pa se procesi i pranimit të Maqedonisë së Veriut në Bashkimin Evropian po përparon dhe pret me padurim të vazhdojë të ndërtojë marrëdhënie të forta me Maqedoninë e Veriut në javët e ardhshme në rrugën e saj drejt anëtarësimit në Bashkimin Evropian.

Shefi i diplomacisë së BE-së vlerësoi Maqedoninë e Veriut për qasjen e saj evropiane, veçanërisht në fushën e politikës së jashtme dhe të sigurisë, ku, siç tha, Maqedonia e Veriut i përmbahet vazhdimisht 100 për qind të gjitha qëndrimeve dhe vendimeve relevante të Unionit.

Më 19 janar, në Ohër ka ndodhur një përleshje ku mbeti i plagosur Hristijan Pendikov, shtetas i Maqedonisë së Veriut me origjinë bullgare dhe sekretar i qendrës kulturore bullgare në Ohër.  Pendikov u dërgua në Sofje me një avion të qeverisë bullgare për mjekim. Hetimet e Prokurorisë së Ohrit janë duke vazhduar. Pas këtij sulmi, qeveria bullgare reagoi ashpër dhe bëri thirrje për konsultime me ambasadorin e saj në Shkup për, siç thanë ata, seriozitetin e situatës në lidhje me të drejtat e bullgarëve në vend dhe përshkallëzimin e krimeve të urrejtjes së fundmi.

josep borell

Sondazh

Poll

MË SHUMË