Bota

U arrestua dy ditë më parë, Gjykata cakton një muaj paraburgim për ish-policin serb

Serbët lokalë ngritën gjashtë barrikada në Leposaviq, Zveçan dhe Zubin Potok në ditën e arrestimit të tij.

12 Dhjetor 2022, 16:38 Nga I.A

U arrestua dy ditë më parë, Gjykata cakton një muaj

KOSOVË- Zëdhënësja e Gjykatës Themelore në Prishtinë, Mirlinda Gashi, i tha Radios Evropa e Lirë se ish-policit serb, Dejan Pantiç, i është caktuar një muaj paraburgim. Ai dyshohet për “kryerjen e veprës penale terroriste”, tha ajo. Pantiç u arrestua më 10 dhjetor në pikëkalimin kufitar në Jarinjë në veri të Kosovës.

Sipas ministrit të Punëve të Brendshme, Xhelal Sveçla, ai “ka organizuar sulmin terrorist” ndaj zyrave të Komisionit Qendror të Zgjedhjeve në veri të Kosovës më 6 dhjetor, kur “ishin sulmuar zyrtarët e KQZ-së dhe zyrtarët policorë”.

Serbët lokalë ngritën gjashtë barrikada në Leposaviq, Zveçan dhe Zubin Potok në ditën e arrestimit të tij. Pikëkalimet kufitare Jarinje dhe Bërnjak janë ende të mbyllura për arsye sigurie. Autoritetet e Kosovës akuzuan “bandat kriminale serbe, të udhëhequra nga Beogradi”, për disa incidente me armë zjarri dhe shok-bomba që ndodhën ditëve të fundit në veri. Zyrtarët serbë thanë se udhëheqësit e Kosovës po përpiqen “t’i dëbojnë” serbët nga veriu.

dejan pantiç tensione në veri të kosovës