Bota

Presidentja e re e Perusë e gatshme të diskutojë zgjedhjet e parakohshme pas rrëzimit të Castillos

Boluarte, e cila mori detyrën të mërkurën pas rrëzimit të paraardhësit të saj, Pedro Castillo, u bëri thirrje bashkatdhetarëve të saj për qetësi dhe përmbajtje mes protestave sporadike në mbështetje të ish-presidentit të vendit.

10 Dhjetor 2022, 07:51 Nga d.a.
Presidentja e re e Perusë e gatshme të diskutojë zgjedhjet e
Dina Bolluarte

PERU- Presidentja e re e Perusë, Dina Boluarte, tha të premten se ishte e gatshme të diskutonte zgjedhjet e parakohshme me forcat politike të vendit, por përjashtoi amendamentet kushtetuese në këtë fazë.

Boluarte, e cila mori detyrën të mërkurën pas rrëzimit të paraardhësit të saj, Pedro Castillo, u bëri thirrje bashkatdhetarëve të saj për qetësi dhe përmbajtje mes protestave sporadike në mbështetje të ish-presidentit të vendit.

Televizioni peruan më herët transmetoi imazhe të qindra fermerëve duke bllokuar një pjesë të një autostrade qendrore, duke kërkuar zgjedhje të parakohshme.

"Nëse shoqëria dhe situata aktuale garantojnë thirrjen e zgjedhjeve, atëherë në konsultim me forcat demokratike dhe politike në Kongres, ne do të ulemi dhe do të diskutojmë. Nuk jam unë që e kam shkaktuar këtë situatë, thjesht po përmbush rolin tim kushtetues. U bëj thirrje motrave dhe vëllezërve të mi që po protestojnë... të qetësohen," u tha Boluarte gazetarëve.

Juristja 60-vjeçare, e cila ishte nënkryetare e Castillo-s, u bë presidentja e parë grua e Perusë dhe mandati i saj do të përfundojë në vitin 2026 nëse nuk thirren zgjedhje të parakohshme.

E pyetur për thirrjet e partive të majta për ndryshimin e Kushtetutës, Boluarte tha se beson se “nuk ka ardhur koha. Tani për tani Peruja po kalon një krizë politike dhe ne gjithashtu duhet të zgjidhim krizën ekonomike dhe ushqimore”.

Presidentja e re e Perusë tha se ajo planifikon të vizitojë Pedro Castillo në burg, duke vënë në dukje se "grushti i shtetit na befasoi të gjithëve, përfshirë ministrat e tij".

Castillo u përpoq të shpërndante Kongresin vetëm disa orë përpara votimit që çoi në rrëzimin e tij. Ai u arrestua dhe përballet me kallëzim penal. Ish-shefi i kabinetit dhe avokati i tij Pedro Castillo pretenduan se ish-presidenti i Perusë e mbajti fjalimin nën ndikimin e drogës.

Autoritetet meksikane njoftuan të enjten se kanë filluar bisedimet me qeverinë peruane në lidhje me kërkesën e Castillo-s në ambasadën meksikane për azil politik. Të premten pasdite, Ministria e Jashtme peruane thirri ambasadorin meksikan për të protestuar kundër kësaj "ndërhyrjeje në punët e brendshme të Perusë".

dina boluarte pedro castillo grusht shteti ne peru

Sondazh

Poll

MË SHUMË