Bota

KE për Malin e Zi: Qeveria dhe Parlamenti s'u përkushtuan për agjendën e BE-së, marrëveshja shkaktoi tensione

KE do të publikojë paketën e zgjerimit së bashku me raporte të veçanta për çdo vend që është në procesin e integrimit evropian më 12 tetor.

11 Tetor 2022, 20:22 Nga k.m.
KE për Malin e Zi: Qeveria dhe Parlamenti s'u përkushtuan
Foto ilustruese

PODGORICË- Ekspertët e KE theksojnë se nuk është bërë asnjë progres në lidhje me reformën gjithëpërfshirëse të kuadrit ligjor dhe institucional zgjedhor, duke përfshirë rekomandimet e Organizatës për Siguri dhe Bashkëpunim në Evropë (OSBE) dhe Zyrës për Institucionet Demokratike dhe të Drejtat e Njeriut (ODHIR). Sipas progres-raportit, qeveritë e Malit të Zi dhe Parlamenti nuk arritën të demonstrojnë në praktikë përkushtimin e tyre ndaj agjendës së reformave në raport me Bashkimin Evropian (BE).

“Polarizimi i tensioneve politike dhe mungesa e angazhimit mes partive politike dhe dështimi për të krijuar konsensus për çështjet kyçe të interesit kombëtar vazhduan dhe çuan në rënien e dy qeverive gjatë votimit të mosbesimit,”- thuhet në dokument.

Përmendet se marrëveshja për Kishën Ortodokse Serbe (KPS) ka ndikuar në atmosferën politike dhe ka shkaktuar rritje të tensioneve. KE do të publikojë paketën e zgjerimit së bashku me raporte të veçanta për çdo vend që është në procesin e integrimit evropian më 12 tetor.

Në raport, Mali i Zi mori një vlerësim të lartë për sa i përket përafrimit me politikën e jashtme të BE-së. Theksohet se vendi ka harmonizuar plotësisht të gjitha vendimet e BE-së, përfshirë masat kufizuese të BE-së pas agresionit të paprovokuar të Rusisë kundër Ukrainës. Gjithashtu thuhet se Mali i Zi i koordinon qëndrimet e tij me qëndrimet e BE-së, përfshirë Organizatën Botërore të Tregtisë, dhe mban bashkëpunim të mirë me organizatat ndërkombëtare.

Mali i Zi në përgjithësi mban marrëdhënie të mira dypalëshe me vendet e tjera në proces zgjerimi në rajon dhe me vendet fqinje anëtare të BE-së. Ndërsa me Serbinë, theksohet se marrëdhëniet mes këtyre dy vendeve “mbesin sfiduese”. Raporti vlerëson se Mali i Zi ka arritur vetëm progres të kufizuar në sistemin gjyqësor.

Dokumenti vlerëson se është arritur vetëm përparim i kufizuar në luftën kundër korrupsionit dhe se rekomandimet e KE të vitit të kaluar janë përmbushur "vetëm pjesërisht" nga autoritetet në Podgoricë. Mali i Zi qëndron pak më mirë në luftën kundër krimit të organizuar, ku thuhet se ka arritur "progres të caktuar" në adresimin e rekomandimeve të vitit të kaluar, veçanërisht në drejtim të efikasitetit të hetimeve penale.

Raporti përmend se disa figura kyçe të grupeve të krimit të organizuar janë arrestuar dhe një tjetër rezultat është arritur në sekuestrimin e drogës. Por, përfundojnë ekspertët e KE-së, mungesa e monitorimit efektiv gjyqësor të rasteve të rëndësishme të vjetra ende shkakton shqetësim serioz./Vijesti

ke per malin e zi

Sondazh

Poll

MË SHUMË