Bota

Tensionet në veri të Kosovës, Grenell: Biden nuk është në dijeni

Duke cituar një zyrtar brenda Këshillit për Siguri Nacionale të Shtëpisë së Bardhë (NSC), Grenell tha se edhe shefi i NSC-së, Jake Sullivan, nuk është i interesuar të trajtojë ngjarjet e tensionuara të cilat ngjanë të dielën në veri.

1 Gusht 2022, 18:33 Nga I.A

Tensionet në veri të Kosovës, Grenell: Biden nuk është

Richard Grenell

SHBA- Ish-emisari special për dialogun Kosovë-Serbi, anëtari i Partisë Republikane në SHBA, Richard Grenell, ka thënë se ka informata brenda Shtëpisë së Bardhë, bazuar në të cilat, presidenti Joe Biden ende është i pa njoftuar për zhvillimet në Kosovë. Duke cituar një zyrtar brenda Këshillit për Siguri Nacionale të Shtëpisë së Bardhë (NSC), Grenell tha se edhe shefi i NSC-së, Jake Sullivan, nuk është i interesuar të trajtojë ngjarjet e tensionuara të cilat ngjanë të dielën në veri.

Sipas Grenellit, vetëm disa zyrtarë të nivelit të ulët në Shtëpinë e Bardhë janë duke e trajtuar situatën në veri të Kosovës. Menaxhimin e situatës në veri të Kosovës, Grenell e quajti “një tjetër gabim” të administratës së Joe Biden.

“Një zyrtar karriere i Zyrës së Këshillit për Siguri Kombëtare (NSC), sapo më tha që Joe Biden nuk është informuar ende për zhvillimet Kosovë-Serbi dhe Jake Sullivan nuk ka kohë për t’u angazhuar plotësisht në këto zhvillime – kështu që ai po e lë trajtimin e kësaj çështje në dorë të nivelit më të ulët të zyrtarëve”, tha Grenell.

Veriu i Kosovës është përfshirë nga tensionet pasi qeveria e Kosovës paralajmëroi se duke nisur nga 1 gushti qytetarët serb që kanë makina me targa me akronime të qyteteve të Kosovës, që lëshohen nga Serbia, do të mund të riregjistrojnë makinat e tyre me targat RKS (Republika e Kosovës). Po ashtu, nga sot u tha se të gjithë shtetasit e Serbisë, që do të hyjnë në territorin e Kosovës, do të pajisjen me një dokument të përkohshëm të hyrje-daljes, që do të zëvendësojnë dokumentet e identifikimit personal nga Serbia. Praktikë të njëjtë Serbia aplikon për shtetasit e Kosovës prej 11 vjetësh. Pas tensioneve dhe kërkesës së SHBA, Kurti vendosi shtyrjen me një muaj të këtij vendimi.

joe biden richard grenell jake sullivan tensione per reciprocitetin