Aktualitet

Zjarri në Lezhë dhe Karbunarë të Lushnjes, flakët janë përhapur kudo. Rrezikohen disa banesa

Ministria e Mbrojtjes bën me dije se gjatë 24 orëve të fundit  janë raportuar 14 vatra zjarri. Por fatmirësisht shumica e tyre janë shuar në kohë duke minimizuar dëmet.

23 Korrik 2022, 15:12 Nga k.m.
Zjarri në Lezhë dhe Karbunarë të Lushnjes, flakët
Pamje nga zjarri

TIRANË- 2 vatra zjarri janë aktive në vendin tonë, në Bërzanë në bashkinë Lezhë ku operacioni nisi që në orën 5 te mëngjesit nga Forcat e Armatosura, e po ashtu Lushnje, në kodrat e Karbunarës. Ministria e Mbrojtjes bën me dije se gjatë 24 orëve të fundit  janë raportuar 14 vatra zjarri. Por fatmirësisht shumica e tyre janë shuar në kohë duke minimizuar dëmet.

Që prej drekës vazhdon prania e zjarreve në territorin e Karbunarës, pasi janë djegur me dhjetëra e qindra hektarë në fushë të hapur një javë më parë dhe dhjetëra hektarë ullishte disa ditë më parë në kodrat e dushkut. Deri më tani raportohet të jenë djegur të paktën 30 hektarë tokë me ullishte dhe bimësi të thatë dhe shkurre.

Vatër zjarri ka aktive edhe në fshatin Bërzanë të Lezhës, pranë Urës së Zogut, situata nga zjarret është përkeqësuar. Raportohet se flakët janë përhapur në masivin me pisha që ndodhe në zonë, duke rrezikuar dhe banesat. Në terren ndodhen forcat e ushtrisë, zjarrfikësit  dhe autoritete të tjerë të cilët janë vendosur pranë zonës së banuar me qëllim mbrojtjen e banesave në rrezik. Ky zjarr u riaktivizua që prej mesditës të së enjtes dhe vijon të jetë aktiv.

Gjithsej deri më tani, në vend janë angazhuar 190 forca operacionale në  terren me 28 mjete, ku përfshihen forcat zjarrfikëse, forca vullnetare dhe Forcat e Armatosura. Zjarret në vendin tonë kanë qenë mjaft problematike gjatë ditëve të shkuara përkatësisht në zonën e Vlorës, Lezhës dhe Krujës. Zjarret e mëdha ishin të favorizuara nga era dhe nga territori i vështirë për të ndërhyrë.

 

berzanë lezhe zjarr ne berzane zjarr ne lushnje

Sondazh

Poll

MË SHUMË