Politike

Kadilli shpreh ambicien për Bashkinë e Tiranës: Dua të garoj, ende s'kam 'bekimin' e Berishës

Fatbardh Kadilli ka thënë se një gjë të tillë e ka konsultuar me miq, kolegë e figura të televizionit, por akoma me kreun e PD-së, Sali Berisha. 

16 Korrik 2022, 13:47 Nga k.m.
Kadilli shpreh ambicien për Bashkinë e Tiranës: Dua të
Fatbardh Kadilli

TIRANË- Fatbardh Kadilli ka folur për projektet e tij në të ardhmen brenda PD-së. Eksponenti dhe ish-kandidati për kreun e Partisë Demokratike ka shprehur hapur ambicien e tij për të marrë drejtimin e Bashkisë së Tiranës. I ftuar në emisionin “Zonë e Lirë” në Tv Klan, i pyetur nga Arian Çani në lidhje me zërat që qarkullojnë se Kadilli ka në plan të jetë kandidat për kryetar bashkie i Partisë Demokratike në Tiranë, Fatbardh Kadilli ka thënë se një gjë të tillë e ka konsultuar me miq, kolegë e figura të televizionit, por akoma me kreun e PD-së, Sali Berisha. 

Gjatë fjalës së tij, Kadilli ka thënë se projekti që ai synon është që opozita të përballet me pushtetin në Tiranë, dhe për këtë beson se do të ketë mbështetjen e Berishës.

PJESË NGA EMISIONI: 

Arian Çani: A është e vërtetë se janë hapur llafe se ti ke në plan dhe pritet të jesh kandidat për kryetar bashkie i PD në Tiranë, sfidant i Erion Veliajt?

Fatbardh Kadilli: Është e vërtetë që e kam konsultuar me miq, kolegë e figura të ekranit mundësinë e kandidimit si përfaqësues i opozitës përballë Erion Veliajt apo kushdo të jetë nga PS për garën e bashkisë. Deri tani ka qenë një konsultim miqsh. Ti po e bën lajm se unë deri tani nuk kam folur publikisht.

Arian Çani: E kam dëgjuar nga disa njerëz. E ke konsideruar me njeriun kryesor të PD, Sali Berisha?

Fatbardh Kadilli: Jo! E kam konsultuar me miq, kolegë, jo me ndërkombëtarë. I kam raportet e duhura, por nuk përcaktojnë karrierën politike në Shqipëri. Kam gatishmëri për një projekt për t'u përballur opozita me pushtetin në Tiranë. Unë besoj që ky projekt që synoj të ngre, do të ketë besoj edhe mbështetjen e Berishës. Por ai do shprehet për mbështetjen e duhur. Para se të shkojmë tek gara, projekti politik që unë synoj të ngjiz është që të kemi një program të bashkuar.

Ndërkohë që për Bashkinë e Tiranës, Veliaj e ka shpallur vetë kandidimin e tij për postin që e mban prej 2 mandatesh, ndërsa po përflitet se edhe Ilir Meta do të mund të garojë vitin që vjen për Tiranën. Mirëpo vetë publikisht nuk e ka pranuar kurrë. 

fatbardh kadilli bashkia e tiranes

Sondazh

Poll

MË SHUMË