Bota

Turqia thërret ambasadorin grek në Ministrinë e Jashtme, diskutohen "qarqet e lidhura me terrorizmin"

Gjatë takimit u shprehën shqetësime edhe për sigurinë e delegacioneve dhe qytetarëve turq në Greqi dhe pala turke përsëriti pritshmëritë e saj

4 Qershor 2022, 10:22 Nga DOSJA
Turqia thërret ambasadorin grek në Ministrinë e Jashtme,
Turqi, Greqi

TURQI- Turqia thirri ambasadorin grek Christodoulos Lazaris, në Ankara në Ministrinë e Jashtme për të diskutuar për atë që tha se Greqia ofronte mundësi për grupet terroriste për të kryer aktivitete.

Ambasadori Lazaris u thirr gjithashtu pasi Greqia lejoi një protestë pranë ambasadës turke në Athinë nga Partia militante e Punëtorëve të Kurdistanit (PKK), të cilën Turqia dhe Bashkimi Evropian e konsiderojnë si një grup terrorist.

Gjatë takimit u shprehën shqetësime edhe për sigurinë e delegacioneve dhe qytetarëve turq në Greqi dhe pala turke përsëriti pritshmëritë e saj për një bashkëpunim efektiv në luftën kundër terrorizmit. Sipas Protothema.gr, u theksua nevoja që Greqia të përmbushë detyrimet e saj që rrjedhin nga marrëdhëniet e fqinjësisë dhe ligji ndërkombëtar në luftën kundër terrorizmit.

Z. Lazaris u informua se organizatat e sipërpërmendura kryejnë lehtësisht aktivitete propagandistike, financimi dhe rekrutimi në Greqi dhe se Greqia konsiderohet edhe më shumë si një strehë e sigurt për "qarqet e lidhura me terrorizmin".

Presidenti i Turqisë Tajip Erdogan, tha këtë javë se Turqia po i ndalte bisedimet me Greqinë, pjesërisht për shkak të një mosmarrëveshjeje me kryeministrin e saj dhe atë që Ankaraja e quan shkelje të hapësirës ajrore, në pengesën e fundit për marrëdhëniet e trazuara prej kohësh të fqinjëve.

 

 

Sondazh

Poll

MË SHUMË