Aktualitet

Ndërroi jetë në Gjermani/ Trupi i Bujar Nishanit do të sillet nesër në Shqipëri

Trupi i ish-presidentit do të vendoset në sallën “Skënderbeu” të institucionit të presidentit. Në orët e mesditës familja do të presë vizitat e rastit dhe homazhet nga miq dhe të afërm të tyre.

31 Maj 2022, 14:01 Nga DOSJA

Bujar Nishani

TIRANË- Ditën e nesërme do të sillet në Tiranë trupi i ish-presidentit Bujar Nishani i cili ndërroi jetë pak ditë më parë në Gjermani për shkak të gjendjes së rënduar shëndetësore. Trupi i ish-presidentit do të vendoset në sallën “Skënderbeu” të institucionit të presidentit. Në orët e mesditës familja do të presë vizitat e rastit dhe homazhet nga miq dhe të afërm të tyre.

Ndërkohë ditën e enjte nga ora 10:00 deri në 12:00 do të mbahen homazhet zyrtare sipas ceremonialit të protokollit të shtetit, ndërsa më pas Nishani do të përcillet drejt banesës së fundit pas orës 12:00. Ai do të prehet në varrezat e Sharrës në Tiranë.

Sipas një vendimi të Këshillit të Ministrave në Prill 2004 të ceremonialit zyrtar, parashikohet ceremoni funebre zyrtare kur ndahet nga jeta një ish-president.

Nishani është i dyti ish-president shqiptar pas Ramiz Alisë që ndahet nga jeta, i cili u përcoll në 9 Tetor 2011 për në banesën e fundit. Atë kohë protokolli i shtetit zhvilloi një ceremoni zyrtare, por pa të shtëna armësh dhe pa bandë nderi e truprojë. Por me shumë gjasë i njëjti skenar nuk do të implementohet për Nishanin.

(k.m/dosja.al)