Sport

Kthimi në normalitet, urimi i presidentit Duka për vitin 2021!

31 Dhjetor 2020, 10:06 Nga DOSJA

Kthimi në normalitet, urimi i presidentit Duka për vitin 2021!

TIRANE – Presidenti Armando Duka, nuk e ka prishur traditën. Në ditën e fundit të vitit 2020, kreu i Federatës Shqiptare të Futbollit ka bërë një përmbledhje të vitit që po lëmë pas dhe iu uron komunitetit të futbollit kthimin sa më shpejt në normalitet, me më shumë shëndet dhe begati për të gjithë shqiptarët në vitin 2021.

“Të dashur miq!
Së pari, uroj të jeni mirë dhe shëndet dhe pranë njerëzve tuaj të dashur në këtë fundvit. Po lëmë pas një vit të vështirë e me shumë peripeci për të gjithë shoqërinë e veçanërisht për futbollin shqiptar.
Uroj me gjithë zemër që viti 2021 të kthejë faqen e historisë dhe të jetë krejt ndryshe nga viti 2020. Ka qenë një vit kalendarik që e ka përballur edhe futbollin, ashtu si edhe çdo fushë të jetës, me sfida të panumërta. Sfida që ne i kemi përballuar me sukses, duke qëndruar bashkë dhe duke qenë si gjithmonë solidar. Në fillim tërmeti i nëntorit 2019 e më pas pandemia Covid-19 na sprovuan fort, por ne nuk u dorëzuam. Mblodhëm fonde dhe tani kemi nisur rindërtimin e katër shtëpive me donacione të siguruara nga federata partnere dhe skuadra kombëtare.
Në kulmin e karantinës së imponuar nga pandemia ne iu gjendëm pranë komunitetit të futbollit, që u braktis në mënyrën më të dhimbshme nga qeveria, duke siguruar dy paga për punonjësit e futbollit kudo në Shqipëri përmes paketës së solidaritetit futbollistik. Rifilluam të gjitha garat dhe treguam se jemi të aftë të menaxhojmë çdo aktivitet futbollistik duke respektuar protokollet sanitare. Kombëtarja mbylli një edicion fantastik sa i takon rezultateve, duke marrë maksimumin në Nations League. Klubet shqiptare gjithashtu bënë një paraqitje mjaft të mirë në kompeticionet evropiane.
Ky vit i vështirë në fakt u mbyll me një lajm fantastik për shqiptarët. Komiteti Ekzekutiv i UEFA-s vendosi që finalja e parë e kompeticionit më të ri evropian për klube “Conference League” të luhet në stadiumin “Air Albania” të Tiranës në maj të vitit 2022. Një arritje historike që na bën krenarë e për të cilën duhet të gëzojmë të gjithë. Mezi presim t’i tregojmë botës një nga tiparet më dalluese të shqiptarëve, siç është mikpritja.
Uroj me gjithë zemër që pasojat e pandemisë të vijnë duke u zbehur dhe bota e qytetëruar të triumfojë mbi këtë të keqe të padukshme që i krijoi kaq shumë probleme njerëzimit.
Kjo është dëshira ime më e madhe për këtë vit ri. Me rikthimin e situatës në normalitet ne do t’u rikthehemi më në fund edhe të gjitha aktiviteteve për të çuar përpara zhvillimin e futbollit.
Ju uroj të gjithëve gëzuar vitin e ri 2021! Qoftë një vit sa më i mbarë dhe i begatë për të gjithë shqiptarët dhe për futbollin! Gëzuar!,”- mbyll urimin e tij Armand Duka, kreu i Federatës Shqiptare të Futbollit.

B.T (Dosja.al)

1 vit nga zgjedhjet e 25 prillit si e shikoni gjendjen e vendit:

View Results

sport sport futbolli shqiptar presidenti armando duka presidenti i fshf urimi per vitin e ri futbolli shqiptar presidenti armando duka presidenti i fshf urimi per vitin e ri