Zjarre apokaliptike në Greqi, evakuohen mijëra familje, spitali përfshihet nga flakët

Edi Rama

GREQI- Kryeministri Edi Rama ka bërë një reagim lidhur me situatën e zjarreve në Greqi, pavarësisht situatës delikate politike.

Në postimin e tij Rama shprehet se është e trishtueshme që të shikosh vendin fqinj që ‘lufton’ me zjarret ndërsa shpreh solidaritet për situatën atje.

“Është shumë e trishtueshme të shikosh vendin tonë të bukur fqinj që vuan vazhdimisht nga zjarret, ndërsa populli i guximshëm grek dhe të gjithë ata në uniformë që luftojnë kundër shkatërrimeve të tilla meritojnë solidaritetin tonë të plotë dhe admirimin e thellë”, shkroi Rama.

zjarret ne Greqi

GREQI- Ndërsa zjarret e reja shkatërruese shpërthejnë në rajone të ndryshme të Greqisë, BE-ja po mobilizon pajisje dhe burime shtesë zjarrfikëse. Pesë avionë zjarrfikës të flotës rescEU të vendosura në Kroaci, Gjermani dhe Suedi, një helikopter Blackhawk, 58 zjarrfikës dhe 9 tanke uji nga Republika Çeke do të mbërrijnë sot në Greqi. Kjo ndihmë i shtohet mjeteve ajrore dhe tokësore nga Qiproja dhe Rumania që mbërritën dje në Greqi.

Gjatë dy ditëve të fundit, BE-ja ka dërguar 7 avionë, 1 helikopter, 114 zjarrfikës dhe 19 automjete për të ndihmuar zjarrfikësit, vullnetarët dhe policinë greke për të shuar zjarret e përhapura në pyje. 

Për më tepër, programi i hartës satelitore të BE-së, ka prodhuar tashmë dy harta të zonave të prekura, ndërsa dy oficerë ndërlidhës nga Qendra e Koordinimit të Emergjencave të BE-së janë rrugës për në Greqi.

Komisioneri për Menaxhimin e Krizave, Yanes Lenarcic tha: “Greqia po përjeton zjarre shkatërruese të një përmase të paprecedentë këtë verë. Në këto rrethana të vështira, ndihma e menjëhershme e BE-së është jetike. Sot, ne shohim rëndësinë thelbësore të dyfishimit të flotës sonë ajrore të zjarrfikësve rescEU përpara sezonit aktual të zjarreve. Shpreh mirënjohjen time të sinqertë për Kroacinë, Republikën Çeke, Gjermaninë dhe Suedinë për mbështetjen e tyre në ndihmë të zjarrfikësve grekë që tashmë po luftojnë fort kundër flakëve. BE-ja është e përkushtuar të qëndrojë fort pranë Greqisë përballë këtyre zjarreve shkatërruese”.

Kjo përpjekje bashkëpunuese pason përgjigjen e menjëhershme të BE-së ndaj kërkesës së mëparshme të Greqisë për të aktivizuar Mekanizmin e Mbrojtjes Civile të BE-së. Muajin e kaluar u nis një mobilizim i koordinuar i 9 avionëve, 510 zjarrfikësve dhe 117 automjeteve për të përballuar zjarret në përshkallëzim.

pamje nga vendngjarja

GREQI- Dhjetëra pacientë janë larguar nga një spital në Greqinë verilindore pasi zjarret kanë dalë jashtë kontrollit për të katërtën ditë pranë Aleksandropolis, raporton Protothema. Sipas Rojës Bregdetare, 65 pacientë janë transportuar në mënyrë të sigurt në traget.

Në pamjet e siguruara pacientët e lidhur me oksigjenin shihen të shtrirë në dyshekë në kuvertën e anijes të shndërruar në repart spitalor. Në breg u ngritën edhe tenda.

Në ndihmë janë gjithsej 30 autoambulanca si dhe 3 automjete ushtarake nën koordinimin e presidentit të EKAV Nikos Papaefstathiou.

foto ilustruese

GREQI- 26 trupa të pajetë janë gjetur në një zonë pyjore të Greqisë veriore të goditur nga zjarret gjatë katër ditëve të fundit, thotë shërbimi grek i zjarrfikësve, raporton BBC.

Raportet e para sugjerojnë se ata që kanë vdekur mund të kenë qenë emigrantë. Një mjek dhe grup hetimor po shkojnë në vendngjarje në pyllin e Dadias.

Rajoni i Evros në Greqinë verilindore, jo shumë larg kufirit turk, është shkatërruar nga zjarret. Pacientët u zhvendosën nga një spital pasi zjarret arritën në Aleksandropolis.