Zhdukja e Sulovarit dhe Thodhorit/ Familjarët vijnë nga Saranda, protestë para Policisë në Tiranë: Na gjeni kufomat!

TIRANË- Altin Gjini, miku i Fatmir Sulovari, një prej dy personave të zhdukur në Sarandë. Në një intervistë të dhënë për "Syri", Altin Gjini tha se Leonard Theodhori, 46 vjeçari i njohur si “Koçole”, ishte shumë në ankth natën e ngjarjes, ndërsa shtoi se kishte gjithmonë frikë. Më tej, ai tregoi se “Koçole” ka shitur dy herë të njëjtën tokë për të cilën mendohet se është vrarë, ndërsa kohët e fundit fliste herë pas here në telefon me një person por që nuk e tregoi kurrë se me kë.

"Unë nuk isha tek takimi me Rrumbullakun, ishin vëllezërit e Fatmirit. është premtuar që hetimet janë në rrugë të mbarë. Ne kemi sinjalizuar për zhdukjen e tyre që në datën 8. Koçolja ishte shumë i shqetësuar dhe kishte ankth, shihte vetëm nga rruga. Kur e merrte në telefon dikush i thoshte Fatmiriti "ishte ai". Se kush ishte ai, mbetet mister. Pa ndodhur zhdukja e tyre ka ndodhur një bisedë me një person, ishte një bisedë shumë kërcënuese. Të zhduken 2 persona për 21 mijë euro mua më duket absurde. Asnjë grup kriminal nuk rrezikon për aq,"-u shpreh ai. 

Sot, familjarët e dy personave të zhdukur në Sarandë, kanë mbajtur këtë të martë një protestë përpara Drejtorisë së Përgjithshme të Policisë së Shtetit për gjetjen e kufomave të familjarëve që i janë zhdukur, ndërsa aktualisht në prangë ka përfunduar, Sofokli Baxheri.

Leonard Theodhori, 46 vjeç i njohur si “Koçole”, i dënuar disa here ishte i dyshuar si pjesëmarrës në Masakrën e Qafë-Gjashtës në vitin 1997 ku u vra oficeri i policisë Gjergj Mehmeti. Në vitin 2003 ka qenë prezent ne automjetin që drejtohej nga Andrea Gjini para se ky i fundit të vriste biznesmenin Jaho Bajo. Ndërsa Fatmir Sulovari alias Fatmir Krasniqi, 46 vjeç, i dënuar më parë për “armëmbajtje pa leje” dhe “plagosja e lehtë me dashje”, është ndaluar edhe disa herë nga Policia me kanabis.

Evanthia Thodhori

SARANDË- Nëna e Leonard Thodhorit në Sarandë ka treguar bisedën e fundit që ka bërë me të birin para se ky i fundit të zhdukej. Në një intervistë për emisionin Uniko, Evanthia Thodhori zbuloi se i biri i kishte kërkuar që nëse ndonjë ditë do të zhdukje, e ëma të shkonte menjëherë dhe ta kërkonte në Polici, duke i lënë të kuptohej se kishte probleme.

“Nëse mungoj 2 ditë qaje Nardin dhe denonco në Polici,”-tha ajo gjatë intervistës, duke shtuar se shkak për konfliktin mund të jetë një tokë në Sarandë dhe një pagesë që është bërë për plot 21 mijë euro. 

PJESË NGA INTERVISTA: 

Evanthia Thodhori: Niko Beduli është shoku i Leonardit më i ngushti, vinte hante në shtëpinë time, pinte.

Spartak Koka: Pra, këtë tokë e kanë bërë si të tyren Niko Beduli shoku i tij i ngushtë dhe Leonard Thodhori, djali juaj.

Evanthia Thodhori: Po. Ke të drejtë tani të hysh në Hipotekë, se mua nuk më tregojnë.

Spartak Koka: Këtu thuhet që për këtë tokë janë paguar 21 mijë Euro. Do merreshin dhe para të tjera të pashlyera për këtë tokë.

Evanthia Thodhori: Po. Po kush i ka?

Spartak Koka: Niko Beduli ishte bashkëpronar?

Evanthia Thodhori: Qe bashkëpronar. Niko Budali ka prona në Gjashtë, ka në Metoq.

Spartak Koka: U tha që ata së bashku e kanë shitur këtë tokën.  Djali të ka shprehur ndonjë frikë?

Evanthia Thodhori: Më tha mua, po mungova 1 ditë tha, po mungova 2 ditë qaje Nardin, po ik në polici denonco. Dakort. Unë vajta menjëherë. Të enjten paradite erdhi më mori me makinë, më tha mua do vish të flesh lart te motra tënde që është vetëm. Do vij bir i nënës i thashë. Erdhi më mori. Në makinë kishte Ylli Gjinikën. Data 6 që erdhi ai. S’kishte humbur Nardi akoma. Po këtë ku e çon ti i thashë unë? Po ti e di o plakë që e kam shok unë atë tha, ne jemi vëllezër. Tha ai unë do vete ta ruaj Koçolen. Pse, i thashë unë? Po ja kështu të vemi bashkë. I thashë unë, o Nardi sonte e do çelësin? Jo tha. Nuk e mori. Më çoi para te Miri. Miri rrinte tek ai lokali. Fatmir Sulovari. Ky pinte raki atje. Ai s’e ktheu kokën, nuk zbriti fare Leonardi. Më tha mua jepi çelësin Mirit se i vjen turp nga ty që të rrinte në shtëpi. I them unë o Miri merr o floriri nënës, merre çelësin mos ta marr unë. Ai përfundimisht nuk e mori. S’e mori, as ai as Nardi. Ku vajti Nardi pastaj? Miri qëndroi atje, ai erdhi këtu me makinën që kishte.  

Vellai i te zhdukurit

TIRANË- Vëllai i Fatmir Sulovarit, Gëzim Sulovari zhvilloi ditën e sotme një takim me drejtorin e Policisë së Shtetit, Muhamet Rrumbullakun. Ai u shpreh se në përfundim, Rrumbullaku i siguroi se do të vijojnë hetimet për të gjetur dy të zhdukurit në Sarandë. Më tej, Gëzim Sulovari tha se nuk kanë asnjë konflikte e se nuk dyshojnë te një person konkret, për zhdukjen e vëllait. 

“Duam që të gjenden trupat dhe t’i çojmë në shtëpi. Policia na tha; do nisim shumë shpejt kërkimet. Nuk më dhanë shpresë. Më thanë se jemi në rrugë, po vijojmë hetimet. Ne ia kemi lënë në dorë Policisë së Shtetit. Jam vëllai i Fatmirit. Besoj u sqaruam me policinë. Takimi im me vëllain ishte në datën 6. Ishte takim normal. E mori një shok në telefon. S’ka pasur probleme.. Ne s’kemi pasur probleme deri në këtë pikë. S’kemi asnjë dyshim. Leonardin e ishte të njohur. Ata kanë qenë të njohur, jo shok. Unë vetë si Gëzim s’e kam njohur Leonardin. S’e di se për çfarë toke bëhet fjalë. Dëgjuam llafe njerëzisht se ata mund të ishin në Vrinë"- tha ai. 

Ditën e sotme, familjaret e dy viktimave të rrëmbyer dhe të zhdukur në 6 prill në Sarandës protestuan para Drejtorisë së Përgjithshme të Policisë së Shtetit. Tre përfaqësues u takuan edhe me kryepolicin Muhamet Rrumbullaku./Dosja.al

Protesta

TIRANË- Me pankarta në duar, familajrët e dy personave të zhdukur në Sarandë Fatmir Sulovari dhe Leonard Theodhorit kanë mbajtur ditën e sotme një protestë përpara Drejtorisë së Përgjithshme të Policisë së Shtetit. Me fotot e dy të zhdukurve në duar,  familjarët kërkojnë një përgjigje nga policia në lidhje me fatin e të afërmve të tyre.

'Ne duam duam trupat, shteti nuk po punon. U bënë 26 ditë, as komunikim nuk kemi. Është si në harresë. Këtë kërkojmë nga shteti se i ka mundësit'- tha xhaxhai i Fatmir Sulovarit.

“Ata nuk kanë pasur konflikte, ndryshe s’do dilnin rrugëve. Nuk e kuptojmë pse policia ka nërprerë kërkimet”.

'Nuk e kuptojmë se përse janë shkëputur kërkimet. Shpresojmë që të na dëgjojnë'

'Do qëndrojmë këtu 24 orë, dërisa të na dëgjojnë'

Drejtori i Policisë Muhamet Rrumbullaku ka planifikuar një takim me 3 prej familjarëve të personave të zhdukur ku pritet t’i informojë ata në lidhje ecurinë e hetimeve. Në lidhje me zhdukjen e dy personave është arrestuar 28-vjeçari Sofokli Baxheri, e sigurisë “arrest në burg”, për veprën penale të “Kryerjes së veprimeve që pengojnë zbardhjen e të vërtetës”.

Kush janë dy personat e zhdukur?

1. Leonard Theodhori, 46 vjeç i njohur si “Koçole”. I dënuar disa here. I dyshuar si pjesëmarrës në Masakrën e Qafë-Gjashtës në vitin 1997 ku u vra oficeri i policisë Gjergj Mehmeti. Në vitin 2003 ka qenë prezent ne automjetin që drejtohej nga Andrea Gjini para se ky i fundit të vriste biznesmenin Jaho Bajo. I arrestuar po atë vit për “moskallezim krimi” lidhur me një ngjarje tjetër të kryer nga Gjini. I arrestuar më pas per “vjedhje” e “mashtrim”. Përdorues i lëndëve narkotike dhe i dyshuar si i perfshirë në trafik lëndësh narkotike.

2. Fatmir Sulovari alias Fatmir Krasniqi, 46 vjeç. I dënuar më parë për “armëmbajtje pa leje” dhe “plagosja e lehtë me dashje”. I arrestuar ne prill 2022 ne Lushnje, pasi ne mjetin e tij “BMW" X5 u gjet nje sasi cannabis sativa e ndarë në doza gati për shitje.

/Dosja.al