Të shtëna me armë gjatë mbledhjes së kryesisë së PD-së në Kurbin, anëtari përplaset me nënkryetarin e qëllon në ajër

Policia

KURBIN- Detaje të reja janë zbuluar nga Policia në lidhje me konfliktin me armë zjarri në degën e PD-së në Kurbin.  Blutë e Kurbinit sqarojnë se ngjarja ndodhi ndërkohë që po zhvillohej një mbledhje, ku ka pasur një debat mes Kastriot Markut dhe 53-vjecarit Van Rica, anëtar partie. Nga ngjarja janë shoqëruar disa persona të pranishëm gjatë konfliktit, ndërkohë që është shpallur në kërkim Rica.

Njoftimi i Policisë:

Kurbin / Qëlloi me armë zjarri, gjatë një konflikti, Policia shpall në kërkim shtetasin V. R. Specialistët për Hetimin e Krimeve në Komisariatin e Policisë Kurbin shpallën në kërkim shtetasin V. R., 53 vjeç, , për veprat penale “Mbajtja pa leje e armëve, armëve shpërthyese dhe municionit”, “Kanosja” dhe “Prishja e qetësisë publike”. Shpallja në kërkim e këtij shtetasi u bë pasi, rreth orës 17:30, Policia e Kurbinit ka marrë njoftim për një konflikt, gjatë së cilit, një shtetas kishte  qëlluar me armë zjarri.

Menjëherë pas marrjes së njoftimit, shërbimet e Policisë kanë shkuar në adresën e dhënë, ku ka rezultar se: Dega lokale e një subjekti politik, në Kurbin po zhvillonte një mbledhje dhe gjatë saj, ka pasur një debat mes shtetasve K. M. ( P), dhe një anëtari, mbështetës i një kandidati tjetër primar, nga ky subjekt politik, për Kurbinin. Në debat e sipër, shtetasi V. R. ka qëlluar me armë zjarri në korridor dhe është larguar menjëherë nga ambientet e degës së subjektit politik.

Shërbimet e Policisë kanë shoqëruar disa shtetas të pranishëm gjatë konfliktit, për t’i marrë në pyetje dhe vijon puna intensive për kapjen e shtetasit V. R. Gjithashtu, në cilësinë e provës materiale është sekuestruar arma e zjarrit tip pistoletë me të cilën  shtetasi V. R., tashmë  i shpallur në kërkim, dyshohet se ka qëlluar. Materialet procedurale iu referuan Prokurorisë së Rrethit Gjyqësor Kurbin për veprime të mëtejshme.

Foto Ilustruese

KURBIN- Konflikti i nisur mes një anëtari të Partisë Demokratike në Kurbin dhe nënkryetarit të saj Kastriot Marku ka përfunuar në të shtëna armësh. Burime për Dosja.al, bëjnë me dije se përplasja ka nisur nga një debat i çastit për kandidatët që do të marrin pjesë në Primare.

Ndërkohë që anëtari i PD-së që përdori armën ka qenë nën efektin e alkoolit. Ende nuk dihet identiteti i anëtarit të PD-së që qëlloi me armë, por policia e ka shpallur në kërkim. 

KURBIN- Detaje të reja kanë dalë nga të shtënat me armë në Kurbin. Mësohet se një konflikt i nisur në takimin e kandidatëve të Primares ka përfunduar në të shtëna me armë. 

Gjatë takimit të kandidatëve të primareve me Kryesinë e PD-së të këtij qyteti ka agravuar në përdorimin e armës. Deri më tani nuk raportohet për të lënduar, teksa policia ka shpallur në kërkim një person.

KURBIN- Të shtëna me armë janë raportuar pasditen e sotme në Kurbin. Mësohet se një person ka gjuajtur në ajër me armë zjarri dhe më pas është larguar nga vendngjarja në drejtim të paditur. Fatmirësisht nga të shtënat me armë nuk ka asnjë person të lënduar.

Ende nuk dihet identiteti i autorit apo arsyet e gjuajtjes me armë, ndërkohë që burime nga policia bëjnë me dije se po punohet për kapjen e autorit. Policia ende nuk ka sjellë një njoftim zyrtar për ngjarjen.