Rusia organizon mbledhje në OKB për të drejtat e fëmijëve, flet me 'Skype' Lvova-Belova, Shqipëria ikën nga seanca: Provokim!

Ferit Hoxha

SHBA- Ambasada Shqiptare në Organizatën e Kombeve të Bashkuara të Amerikës ka bërë me dije se Shqipëria është larguar nga mbledhja që po mbahej në Këshillin e Sigurimit, pasi Rusia nisi që të fliste për të drejtat e fëmijëve. Sqarimin për largimin e ka bërë vetë ambasada shqiptare në UN. Kjo pasi sipas tyre, fjalimi i Rusisë ishte një provokim cinik, pasi përfaqësuesja e Rusisë, Maria Lvova-Belova kundërshtoi akuzat e bëra ndaj saj për rrëmbimet e fëmijëve ukrainas.

"Shqipëria mori pjesë në 'Arria-formula'. Por doli nga dhoma kur Maria Lvova-Belova, e paditur nga Gjykata Ndërkombëtare iu dha fjala, për të treguar kundërshtimin dhe refuzimin e saj për këtë provokim cinik, pasi nisi të fliste për “evakuimin” e fëmijëve ukrainas nga Ukraina në Rusi. Belova është nën urdhër arresti, e akuzuar për dëbim dhe transferim të paligjshëm të fëmijëve. Në vend që të ligjërojë në OKB për situatën e fëmijëve në Ukrainë, ajo duhet të paraqitet në një gjykatë për t'iu përgjigjur akuzave shumë të rënda të ngritura kundër saj."-shkruan ambasada shqiptare. 

Gjatë mbledhjes, përfaqësuesit diplomatikë të SHBA-së dhe Britanisë së Madhe, së bashku me ata të vendeve të tjera, u larguan nga salla e gjyqit, ndërsa komisionerja ruse për të drejtat e fëmijëve, Maria Lvova-Belova, foli përmes një lidhje ‘skype’ duke mohuar akuzat e bëra ndaj Rusisë për krime lufte. Madje Lvova-Belova, për të cilën është prerë një mandat-arresti argumentoi se Moska është e gatshme të bashkëpunojë për ribashkimin e fëmijëve ukrainas me familjet e tyre.

Takimi

SHBA- Moska përdori presidencën e saj të rradhës të Këshillit të Sigurimit të OKB-së për të organizuar një takim jozyrtar mbi fëmijët ukrainas të deportuar me forcë në Rusi, duke u mbrojtur kundër një akuze që Gjykata Penale Ndërkombëtare e cilësoi si një krim lufte. Për këtë arsye, përfaqësuesit diplomatikë të Shteteteve të Bashkuara, Britania e Madhe, Shqipëria dhe Malta u larguan nga salla e gjyqit, ndërsa komisionerja ruse për të drejtat e fëmijëve, Maria Lvova-Belova, po fliste përmes një lidhje ‘skype’, raporton 'Aljazzera'.

Lvova-Belova argumentoi se Moska është e gatshme të bashkëpunojë për ribashkimin e fëmijëve ukrainas me familjet e tyre. 

“Nuk kemi dyshime se kjo është një fushatë për të diskredituar vendin tonë”, tha ajo.

Më tej, ajo tregoi video të fëmijëve ukrainas në Rusi, më pas tha: "Dua të theksoj se ndryshe nga pala ukrainase, ne nuk i përdorim fëmijët për propagandë".

Ambasadorja e SHBA-së në OKB, Linda Thomas-Greenfield, u tha gazetarëve se Shtetet e Bashkuara iu bashkuan Britanisë në bllokimin e transmetimit në internet në mënyrë që Lvova-Belova të mos kishte "një podium ndërkombëtar për të përhapur dezinformata dhe për t'u përpjekur të mbronte veprimet e saj të tmerrshme që po ndodhin në Ukrainë."

Gjykata Ndërkombëtare Penale muajin e kaluar lëshoi ​​një urdhër arresti kundër presidentit rus Vladimir Putin dhe Lvova-Belova, duke i akuzuar ata për deportim të paligjshëm të fëmijëve nga Ukraina dhe transferim të paligjshëm të njerëzve në Rusi nga Ukraina që kur Rusia pushtoi më 24 shkurt 2022./Dosja.al