"Ka punë më të rëndësishme se sa të shkosh në Beograd, ta shoqërojmë me polici", Komisioni për TIMS, mungon drejtoresha e SHISH, Salianji: E pranoni që jeni kapur

Asllan Dogjani

TIRANA- Deputeti i Partisë Demokratike, Asllan Dogjani tha sot se ndërhyrja në sistemin TIMS është bërë me urdhër të politikës. Dogjani tha në Komisionin Hetimor për Sistemin TIMS, se në këtë rast është cënuar siguria kombëtare. Ai shtoi se se kjo u bë me qëllim që persona me pushtet politik të fshihnin gjurmët e tyre për lidhjet me krimin.

“Është provuar se në sistem është ndërhyrë dhe janë eksportuar të dhënat, me USB, dhe ndodhen në Prokurorinë e Tiranës. Kanë dalë raste kur zyrtarë, ku shihen përmes sistemit TIMS, udhëtojnë me eksponentë të krimit, si Ahmetaj. Edhe budalli e di se pas kësaj ndërhyrje qëndrojnë persona me pushtet, me suport politik", tha ai.

Ervin Salianji

TIRANA- Kanë vijuar debatet në Komision hetimor për sistemin TIMS pas deklaratës së kryetarit Ervin Salianji, se drejtuesja e SHISH Vlora Hyseni ndodhet në një aktivitet në Beograd dhe nuk mund të dëshmojë në këtë komision. Deputeti Nasip Naço, i kërkoi Salianjit që të jetë më i kujdesshëm me akuzat ndaj Hysenit, duke pasur parasysh edhe pozicionin e saj. Salianji iu kthye duke i thënë "e pranoni se jeni të kapur".

Pjesë nga debati:

Naço: Kjo është për lavdinë tuaj personale

Salianji: E pranoni që jeni të kapur.

Naço: Për pjesën e drejtueses së SHISH, që qenkeni i zoti në të. Sigurinë nuk e morëm dot, ajo ka ardhur edhe kur anëtarët e opozitës nuk ishin. Vini birbilosni sot…

Komisioni

TIRANA- Neritan Nallbati, drejtor i Departamentit të Policisë Kriminale, në Drejtorinë e Përgjithshme të Policisë e Shtetit, kërkoi që dëshmia e tij të jetë me dyer të mbyllura, pasi tha se ka sekrete hetimore. Socialistët në Komisionin hetimor për sistemin TIMS, votuan 'pro' kërkesës së Nallbatit.

Sot ishte parashikuar të vinte në Komision për të dëshmuar dhe drejtoresha e Shërbimit Informativ Shtetëror, Vlora Hyseni e cila nuk është paraqitur në Komision. 

RENDI:

Komisioni Hetimor për trajtimin e të dhënave të sistemit TIMS, 26 Qershor 2024
Miratim i procesverbaleve të mbledhjeve datë 4.06.2024 dhe 11.06.2024.
Si dhe zhvillimi i seancave dëgjimore me dëshmitarët si vijon:
1. Ora 11:00 – Z. Neritan Nallbati – Drejtor i Departamentit të Policisë Kriminale, në Drejtorinë e Përgjithshme të Policisë e Shtetit.
2. Ora 12:00 – Z. Zef Laska, Drejtor i Burimeve Njerëzore, në Drejtorinë e Përgjithshme të Policisë e Shtetit;
3. Ora 13:00 – Z. Enri Ndoni, Drejtor i Sistemeve të Policisë, në Drejtorinë e Përgjithshme të Policisë e Shtetit;
4. Ora 14:00 – Z. Saimir Boshnjaku, Drejtor i Departamentit për Kufirin dhe Migracionin.

Xhemal Qefalia

TIRANA- Vijon mes debatesh mbledhja e sotme e Komisionit Hetimor për sistemin TIMS. Gjatë fjalës së tij, socialisti Xhemal Qefalia iu kundërpërgjigj ironive të kryetarit, Ervin Salianji. Qefalia tha se Salianji po thoshte gjëra të llahtarshme dhe se shpreson se deri në fund të punimeve të komisionit të bëjnë gjëra të mira.

"Mos përmendni fjalë të tjera, Beograd apo Sofja. Sa i përket gjërave që mundoheni sa herë që keni të drejtën dhe mundësinë për të folur hapur me mediat, thoni gjërat e ‘llahtarshme’. Por kur dëgjoni dëshmitarët, nuk thoni ashtu. Unë shpresoj që në fund të punimeve të këtij komisioni, të bëjmë një gjë të mirë dhe të ofrojmë zgjidhje ligjore. Është e vërtetë që Kuvendi i Shqipërisë ka miratuar dhe 3 anëtarë të tjerë zëvendësueses dhe ju duhet t’i kishit bërë publike", tha Xhemal Qefalia.

Nga ana tjetër ka ardhur dhe reagimi i Salianjit i cili tha se arsyetimi i drejtoreshës së SHISH ishte i pajustifikueshëm.

"Këtu nuk është me qejf zoti Qefalia, por është me detyrim që të japë dëshminë si dëshmitare. Është e pajustifikueshme të thuash; nuk vij se kam një punë. Institucionet e kësaj Republike i ka kthyer në hiçgjë. Pse ça është SHISH? Është institucion privat. Janë favorizuar persona të paautorizuar nga policia, janë fshehur të dhëna", tha Salianji.

Ervin Salianji

TIRANA- Drejtoresha e SHISH, Vlora Hyseni sot duhej të ishte e pranishme për të folur si dëshmitare në mbledhjen e Komisionit Hetimor për sistemin TIMS. Në fakt Hyseni nuk është paraqitur. 

Kryetari i këtij komisioni, Ervin Salianji nuk i kurseu ironitë ndaj mazhorancës dhe faktit që Hyseni nuk ishte e pranishme teksa tha se do të njoftohej policia.

"Në 11:00 ishte lajmëruar për të dhënë dëshminë drejtori i SHISH, na ka sjellë një shkresë ku thuhet se drejtori do të jetë në një aktivitet. Ç’a e tund kokën kot, se nuk është dasmë këtu. Ta shoqërojmë me polici, do të lajmërojmë policinë, do e vëmë në dijeni dhe drejtoresha, që ka punë më të rëndësishme se sa të shkosh në Beograd.

Të vijë të japë dëshmi, siç e përcakton ligji. Jeni si lakuriqët e natës. Keni frikë. Keni bërë dëshmitë me dyer të mbyllura, se keni frikë nga ato që do të dalin. Keni bërë gati dhe nja 2 deputetë të tjerë, se ju duhet ndihma e të tjerëve", tha Salianji.