Gjykata e Lartë vendos: TikTok mbyllet të dielën në SHBA, nëse nuk shitet nga kompania kineze! Trump: Ndalimi i platformës varet nga unë! Shihni çfarë do të bëj

Foto ilustruese

SHBA- Gjykata e Lartë mbështeti të premten unanimisht ligjin federal që ndalon rrjetin TikTok në Shtetet e Bashkuara duke filluar nga e diela, nëse nuk shitet nga kompania e saj mëmë me seli në Kinë. Gjykata vlerëson se rreziku për sigurinë kombëtare që vjen nga lidhjet e rrjetit TikTok me Kinën, i kapërcen shqetësimet për kufizimin e lirisë së shprehjes për 170 milionë përdoruesit e këtij aplikacioni në Shtetet e Bashkuara.

Shitja e rrjetit TikTok nuk duket se mund të ndodhë së shpejti dhe megjithëse ekspertët kanë thënë se aplikacioni nuk do të zhduket nga telefonat e përdoruesve ekzistues pasi ligji të hyjë në fuqi më 19 janar, përdoruesit e rinj nuk do të mund ta shkarkojnë atë dhe përditësimet e aplikacionit do të bllokohen. Kjo përfundimisht do ta bëjë aplikacionin jofunksional, thuhet në materialet e paraqitura në gjykatë nga Departamenti i Drejtësisë.

Vendimi erdhi në sfondin e komenteve nga Presidenti i zgjedhur Donald Trump, i cili u zotua se mund të negociojë për një zgjidhje dhe ndërsa administrata e Presidentit Joe Biden ka sinjalizuar se nuk do ta zbatojë ligjin duke filluar nga e diela, dita e tij e fundit e plotë në detyrë.

Presidenti i zgjedhur Trump, i vetëdijshëm për popullaritetin e rrjetit TikTok dhe për 14.7 milionë ndjekësit e tij në këtë aplikacion, e gjen veten në anën e kundërt të argumentit të paraqitur nga senatorë të njohur republikanë, të cilët fajësojnë kompaninë kineze, që ka në pronësi rrjetin TikTok që nuk ka gjetur një blerës më parë.

Është e paqartë se cilat opsione janë të hapura për zotin Trump, pasi ai të betohet si president të hënën. Ligji lejon një pauzë 90-ditore të kufizimeve ndaj aplikacionit, nëse do të kishte përparim drejt shitjes, përpara se të hynte në fuqi. Avokatja e shtetit Elizabeth Prelogar, e cila mbrojti ligjin në Gjykatën e Lartë në emër të administratës së Presidentit Biden, u tha gjykatësve javën e kaluar se është e pasigurt nëse perspektiva e një shitjeje pasi ligji të ketë hyrë në fuqi mund të mundësonte një afat 90-ditor për TikTok-un.

Gjatë dëgjimit të argumentave, një avokat i rrjetit TikTok dhe kompanisë mëmë kineze ByteDance Ltd., tha se do të ishte e vështirë të arrihej një marrëveshje shitjeje, në veçanti pasi ligji kinez kufizon shitjen e algoritmit që e ka bërë jashtëzakonisht të suksesshme këtë platformë të mediave sociale.

Aplikacioni u mundëson përdoruesve të shikojnë qindra video në gati gjysmë ore, sepse disa prej tyre zgjasin vetëm disa sekonda, thuhet në një padi të ngritur vitin e kaluar nga shteti Kentucky, ku akuzohet se TikTok-u është konceptuar për të krijuar ndërvarësi dhe për të dëmtuar shëndetin mendor të fëmijëve. Padi të ngjashme u ngritën nga mbi dymbëdhjetë shtete të tjera amerikane. Rrjeti TikTok i ka quajtur pretendimet të pasakta. Mosmarrëveshja mbi lidhjet e TikTok-ut me Kinën mishëron konkurrencën gjeopolitike ndërmjet Uashingtonit dhe Pekinit.

Shtetet e Bashkuara kanë thënë se janë të shqetësuara se qeveria kineze mund të mbledhë një sasie të madhe të të dhënave të përdoruesve nga TikTok-u, përfshirë informacione të rëndësishme, që mund të merren nga qeveria kineze. Zyrtarët kanë paralajmëruar gjithashtu se algoritmi që përcakton përmbajtjen që përdoruesit shohin në aplikacion, është i ekspozuar ndaj manipulimit nga autoritetet kineze, të cilët mund ta përdorin atë për t’i dhënë trajtë përmbajtjes në platformë, në një mënyrë që është e vështirë për t'u zbuluar.

TikTok-u thekson se Shtetet e Bashkuara nuk kanë paraqitur prova që Kina të jetë përpjekur të manipulojë përmbajtjen në platformën e saj amerikane, ose që të mbledhë të dhëna të përdoruesve amerikanë nëpërmjet TikTok-ut. Legjislacioni u miratua me një shumicë dypartiake në Kongres dhe Presidenti Joe Biden e nënshkroi atë në muajin prill. Ligji ishte pika kulmore e një sage shumëvjeçare në Uashington rreth TikTok-ut, që qeveria amerikane e sheh si një kërcënim ndaj sigurisë kombëtare./ VOA

Donald Trump

SHBA- Gjykata Supreme e Shteteve të Bashkuara të Amerikës të premten vendosi njëzëri që të miratojë ligjin federal që e ndalon TikTok-un duke filluar nga e diela, përveçse nëse shitet nga kompania e saj amë me bazë në Kinë. Gjykata argumentoi se rreziku për sigurinë kombëtare i shkaktuar nga lidhjet me Kinën tejkalon shqetësimet për kufizimin e lirisë së shprehjes nga aplikacioni ose 170 milionë përdoruesit e tij në Shtetet e Bashkuara, raporton AP.

Shitja nuk duket se është afër dhe, megjithëse ekspertët kanë thënë se aplikacioni nuk do të zhduket nga telefonat e përdoruesve ekzistues pasi ligji të hyjë në fuqi më 19 janar, përdoruesit e rinj nuk do të jenë në gjendje ta shkarkojnë atë e as të përditësojnë.

Kjo, eventualisht, do ta bëjë aplikacionin të papërdorshëm, ka thënë Departamenti i Drejtësisë në dokumentet gjyqësore. Presidenti i zgjedhur, Donald Trump, premtoi se mund të negociojë për një zgjidhje, kurse administrata e presidentit Joe Biden ka sinjalizuar se nuk do ta zbatojë ligjin duke filluar nga e diela, dita e tij e fundit e plotë në detyrë.

Trump, i vetëdijshëm për popullaritetin e TikTok-ut dhe për 14.7 milionë ndjekësit e tij në këtë aplikacion, gjendet në anën e kundërt të argumentit nga republikanët e njohur të Senatit, të cilët fajësojnë pronarin kinez të TikTok-ut për mosgjetjen e një blerësi deri tani.

Nuk është e qartë se cilat opsione do të jenë të hapura për Trumpin pasi të betohet si president të hënën. Reuters raporton se Ligji për TikTok-un i jep presidentit autoritetin për të dhënë një zgjatje të vetme deri në 90 ditë për afatin e shitjes, nëse ai vërteton se ekziston një rrugë dhe prova për përparim drejt një shitjeje, duke përfshirë "marrëveshje ligjore të detyrueshme", të cilat ligji nuk i përcakton.

Aplikacioni u mundëson përdoruesve të shikojnë qindra video brenda rreth gjysmë ore, pasi disa prej tyre janë vetëm disa sekonda të gjata, sipas një padie të ngritur vitin e kaluar nga shteti i Kentakit, ku pretendohet se TikTok-u është i dizajnuar për të krijuar varësi dhe dëmton shëndetin mendor të fëmijëve. Padi të ngjashme janë ngritur nga më shumë se një duzinë shtetesh. TikTok-u i ka quajtur këto pretendime të pasakta. Mosmarrëveshja mbi lidhjet e TikTok-ut me Kinën ka marrë formën e konkurrencës gjeopolitike ndërmjet Uashingtonit dhe Pekinit.

Shtetet e Bashkuara kanë deklaruar se janë të shqetësuara për mbledhjen e sasive të mëdha të të dhënave nga TikTok-u, përfshirë informacionin e ndjeshëm mbi zakonet e shikimit, që mund të përfundojnë në duart e Qeverisë kineze përmes detyrimit. Zyrtarët, gjithashtu, kanë paralajmëruar se algoritmi që përcakton çfarë shohin përdoruesit në aplikacion është i cenueshëm ndaj manipulimit nga autoritetet kineze, të cilat mund ta përdorin atë për të formësuar përmbajtjen në platformë në një mënyrë të vështirë për t’u zbuluar.

Ndërkaq, TikTok-u thekson se SHBA-ja nuk ka paraqitur prova që Kina ka tentuar të manipulojë përmbajtjen në platformën e saj në SHBA ose të mbledhë të dhëna të përdoruesve amerikanë përmes TikTok-ut. Pa u shitur te një blerës, ligji ua ndalon gjigantëve teknologjikë Apple, Google dhe të tjerëve që të ofrojnë TikTok-un duke filluar nga e diela./ REL

SHBA- Presidenti i sapozgjedhur Donald Trump tha se foli në telefon me presidentin kinez Xi Jinping të premten për TikTok. Trump është shprehur se vendimi për zbatimin e ndalimit të TikTok do të varet nga ai. 

“Thirrja ishte shumë e mirë si për Kinën ashtu edhe për SHBA-në. Presim që ne të zgjidhim shumë probleme së bashku, dhe duke filluar menjëherë. Ne diskutuam balancimin e Tregtisë, Fentanyl, TikTok dhe shumë tema të tjera. Presidenti Xi dhe unë do të bëjmë gjithçka që është e mundur për ta bërë botën më paqësore dhe më të sigurt! Përfundimisht vendimi varet nga unë. Ju do të shihni se çfarë do të bëj," tha Trump në një postim të Truth Social .

Xi pas telefonatës tha se ai dhe Trump shprehën shpresën për përparim më të madh në marrëdhëniet SHBA-Kinë.  Biseda e Trump me Xi-n për TikTok erdhi pak përpara se Gjykata e Lartë të mbështeste një ligj federal që do të ndalojë në mënyrë efektive aplikacionin popullor të ndarjes së videove në SHBA. 

tiktok

KINË- Pekini për një kohë të gjatë, ka kundërshtuar sugjerimet se TikTok paraqet çdo lloj kërcënimi sigurie për përdoruesit jashtë shtetit. Mediat shpesh kanë sugjeruar që përpjekjet për të shtypur rritjen e platformës janë të motivuara politikisht dhe se audienca perëndimore thjesht do të kalojë në aplikacione të tjera që ata mendojnë se kanë funksione superiore ndaj ofertave të mediave sociale të Amerikës si Facebook dhe X.

Kjo mund të dëshmohet këtë javë nga "refugjatët e TikTok" që migrojnë në një aplikacion tjetër kinez: RedNote, i cili është ngjitur lart në grafikët e aplikacioneve. Ka shpresa të mediave se Trump mund ta shpëtojë platformën, me disa media kineze që raportojnë se ai ka treguar vazhdimisht mbështetje për TikTok, pavarësisht se u përpoq ta ndalonte atë kur ai ishte më parë president.

Mediat kanë vënë në dukje gjithashtu se CEO i TikTok pritet të marrë pjesë në inaugurimin e tij. Ekziston një ndjenjë se nëse TikTok përfundon duke u ndaluar, SHBA do të jetë hipokrite për vlerat e saj të lirisë dhe demokracisë.

Agjencia China News Service citoi një përdorues amerikan të mediave sociale në fillim të kësaj jave, i cili ka emigruar në RedNote të ketë thënë: “Qeveria e SHBA e cilëson TikTok si një çështje të sigurisë kombëtare, por në fakt, ajo po përpiqet të kufizojë lirinë e fjalës amerikane”.

Foto ilustruese

SHBA- Gjykata e Lartë në SHBA ka vendosur që TikTok do të ndalohet atje nga e diela nëse nuk shitet nga kompania e tij mëmë kineze. Presidenti aktual Joe Biden ka thënë se nuk do ta zbatojë ndalimin për orët e mbetura që ai është në detyrë, duke ia lënë në dorë Donald Trump të vendosë se çfarë të bëjë kur të hyjë në Shtëpinë e Bardhë të hënën. 

Gjyqtarët vendosën se ligji, i miratuar nga një shumicë dërrmuese dypartiake në Kongres vitin e kaluar dhe i nënshkruar nga presidenti demokrat Joe Biden, nuk shkeli mbrojtjen e Amendamentit të Parë të Kushtetutës së SHBA kundër shkurtimit të fjalës së lirë nga qeveria. Gjyqtarët rrëzuan vendimin e një gjykate më të ulët që kishte lënë në fuqi masën pasi u kundërshtua nga TikTok, ByteDance dhe disa nga përdoruesit e aplikacionit.

"Nuk ka dyshim se, për më shumë se 170 milionë amerikanë, TikTok ofron një rrugë të veçantë dhe të shtrirë për shprehje, mjete angazhimi dhe burim të komunitetit. Por Kongresi ka vendosur se shpërndarja është e nevojshme për të adresuar shqetësimet e tij të sigurisë kombëtare të mbështetura mirë në lidhje me praktikat e mbledhjes së të dhënave të TikTok dhe marrëdhëniet me një kundërshtar të huaj”, tha gjykata në opinionin e panënshkruar.

Gjykata e Lartë veproi me shpejtësi në këtë çështje, pasi kishte mbajtur argumente më 10 janar, vetëm nëntë ditë përpara afatit të përcaktuar me ligj. Rasti vuri të drejtat e fjalës së lirë kundër shqetësimeve të sigurisë kombëtare në epokën e mediave sociale.

TikTok është një nga platformat më të spikatura të mediave sociale në Shtetet e Bashkuara, e përdorur nga rreth 270 milionë amerikanë, afërsisht gjysma e popullsisë së vendit, duke përfshirë shumë të rinj. Algoritmi i fuqishëm i TikTok, pasuria e tij kryesore, u ofron përdoruesve individualë video të shkurtra të përshtatura sipas dëshirës së tyre. Platforma paraqet një koleksion të madh videosh nga përdoruesit, shpesh më pak se një minutë në kohëzgjatje, që mund të shikohen me një aplikacion të telefonit inteligjent ose në internet.