Fitër Bajrami/ Besimtarët kryejnë faljen e namazit në “Sheshin Skënderbej”, kreu i KMSH-së: Hiqni dorë nga braktisja e vendit

Xhami

TIRANË- Myslimanët në botë festojnë sot fillimin e Fitër Bajramit, një festë që shënon fundin e muajit të shenjtë të agjërimit mysliman të Ramazanit. Fitër Bajrami treditor, një nga dy festat kryesore të Islamit është shënuar me faljen e namazit në të gjithë qytetet e fshatrat e Shqipërisë ku ka besimtarë myslimanë, të cilët kanë shkëmbyer mesazhe paqeje. Ja si u kremtua mëngjesin e sotëm në disa qytete.

Në të gjitha Xhamitë e bashkive të Qarkut të Elbasanit u zhvillua falja e Fiter Bajramit. Ndërsa në Bulevardin kryesor të këtij qyteti u mblodhën të paktën 3.500 besimtare e besimtarë të grupmoshave të ndryshme me rastin e faljes së Fiter Bajramit.

Myftiu, Ylli Gurra bëri bashkë në Librazhd, në Iftarin e fundit të gjithë aktorët e politikës lokale dhe ata të bashkësive fetare në Iftarin e fundit ku u dhanë mesazhe mjaft të vlefshme për të gjithë shoqërinë shqiptare, ku ishin të pranishëm edhe dy kandidatet për Kryetar Bashkie, ai i PS, Mariglen Disha dhe Shefki Çota i “Bashkë fitojmë”. 

Besimtarët myslimanë në Fier, që në orët e para të mëngjesit besimtarët kanë falur Namazin ne xhaminë e qytetit të Fierit, ndërsa kreu e Myftinisë Fier Mikel Hazizolli ka përcjellë urimet për mirësi dhe harmoni.

Edhe në Durrës besimtarët myslimanë falën namazin e Fiter Bajramit në sheshin pranë xhamisë. Burra, gra e të rinj janë mbledhur për ritualin fetar pas muajit të madhërueshëm të Ramazanit. Ata kanë shkëmbyer mesazhe paqeje e dashurie me njeri-tjetrin.

Besimtarët në Lushnjë falën namazin e Fiter Bajramit në sheshin kryesor të qytetit. 

Në Lezhë besimtarë të shumtë e falen namazin në xhaminë e Lezhës. Myftiu i Lezhës Sadedin Kotrri, në fjalën e tij tregoi rëndësinë e kësaj feste, duke kujtuar të gjithë ata që agjëruan për 30 ditë.

Në qytetin e Korçës, pas përfundimit të muajit të shenjtë të Ramazanit, qindra besimtare myslimanë mëngjesin e sotëm, u mblodhën për të falur namazin e festës së shenjtë të Fitër Bajramit. Pas faljes besimtarët uruan njëri-tjetrin për sa më shumë mbarësi, begati dhe shpresa në familjet e tyre.

Në Vlorë, rreth orës 7 të mëngjesit besimtarët myslimanë kanë falur namazin në sheshin para xhamisë së Plumbit.

Besimtaret

TIRANË- Pas agjërimit të muajit të Ramazanit, besimtarët myslimanë sot festojnë festën e Fitër Bajramit.

Që në orët e para të mëngjesit besimtarët kanë falur Namazin në sheshin 'Skëndërbej'. Siç shihet edhe në fotot e siguruara nga Dosja.al, sheshi u mbush plot me besimtarë.

Fitër Bajrami treditor, një nga dy festat kryesore të Islamit është shënuar me faljen e namazit në të gjithë qytetet e fshatrat e Shqipërisë ku ka besimtarë myslimanë, të cilët kanë shkëmbyer mesazhe paqeje. Ja si u kremtua mëngjesin e sotëm në disa qytete./Dosja.al

Bujar Spahiu

TIRANË- Mijëra besimtarë myslimanë janë mbledhur ditën e sotme në sheshin Skënderbej për faljen e Fitër Bajramit. Pas një muaji agjërim besimtarët myslimanë ashtu si në të gjithë botën kanë falur në orët e para të mëngjesit Namazin në sheshin Skënderbej duke shkëmbyer edhe urimet e para mes njëri tjetrit.

Kreu i KMSH Bujar Spahiu ka përcjellë një mesazh për të gjithë besimtarët duke bërë thirrje për të rinjtë të mos e braktisin vendin por të qëndrojnë këtu për të forcuar kombin e tyre.

MESAZHI:

Të dashur agjërues, Mëngjesi i kësaj dite është më i bukuri e më kuptimploti për të gjithë ne. Kemi Bajram dhe kjo na qëllon në ditën më të bukur të javës, ditë bajrami e xhumaje. Kemi përjetuar një muaj sakrifice dhe ngritje shpirtërore, e lusim Zotin të na ketë pranuar këtë sakrificë, Ai është shpërblyesi më i mirë.

Ky muaj na ka bashkuar në bamirësi e solidaritet, në paqe e dashuri me njëri-tjetrin.

Njeriu i sotëm ka rendur pas kësaj bote, pas pasurisë e pushtetit, duke harruar hyjnore dhe njerëzoren. Te Zoti i gjithësisë as njëra as tjetra nuk bëjnë dobi nëse nuk është devotshmëria.

Nuk është e askujt kjo botë, askush nuk e ka zotëruar e nuk do ta zotërojë kurrë.

Të dashur motra dhe vëllezër

Ramazani është adhurimi më intim i njeriut, ndaj edhe shpërblimin për të Zoti e ka vlerësuar shumë të madh.

Ramazani nuk është vetëm lënia e të ngrënit e të pirit. Ramazani është lënia e veseve, përgojimit, thashethemit, lënia e punëve të pa dobishme. Ashtu siç heqim një rrobë të pistë nga trupi për ta larë, ashtu shpreson edhe besimtari të ketë dalë sot, i pastër nga gjynahet, i falur e i mëshiruar nga Zoti.

Sfida fillon sot për çdonjërin prej nesh. Të vijojmë jetën me vitytet që kemi fituar në këtë muaj të begatë.

Ramazani na mëson që të bëhemi shërbëtor të së mirës dhe së drejtës.

Duhet të jetë virtyti themel i veprimtarisë sonë të përditshme.

Të dashur qytetarë,

virtyti nuk është fantazi.

Në ditët e sotme ndoshta ua thonë kështu, por mos harroni se ata që ua thonë janë të pasinqertë.

Ata duan qëllimisht t’ju sugjerojë dhe shtyjnë drejt maksimave të rreme, të cilat herët a vonë do të shkaktojnë dëm për vetet tuaja.

Krijoni raport të drejtë e të ndershëm me virtytin, le të jetë ai udhërrëfyesi i jetës tuaj. Sa më të shumtë të jenë njerëzit e virtytshëm, aq më shumë do të dekurajohet e keqja dhe shërbëtorët e saj.

Profeti Muhamed (a.s.) na porosit që të keqen ta largojmë në tre mënyra nga mesi jonë- ta largojmë me dorë, e nëse nuk mundemi me dorë, ta largojmë me fjalë, e nëse edhe me fjalë nuk mundemi, ta largojmë me zemër, por kjo është më e dobët se dy të parat.

Themeli i vitytit është drejtësia.

Motra dhe vëllezër,

kujdesuni që Kombi jonë të rritet nëpërmjet virtytit!

Secili nga ne e ka detyrë të kontribuojë për të frenuar mpakjen e kombit. Po pakësohemi dita-ditës. Ne që kemi qenë një nga popujt me moshën më të re në Europë po plakemi me ritme shumë të shpejta.

Pse duhet të zgjedhim rrugën më të lehtë, braktisjen e vendit, në vend të qëndrimit këtu dhe të forcimit të kombit tonë.

Të lindim fëmijët këtu, t’i rrisim këtu në vendin tonë si qytetarë me virtyte dhe të dorës së parë në vend që t’i çojmë si qytetarë të dorës së dytë nëpër botë!

Familja është bërthama e çdo shoqërie. Ta forcojmë atë ashtu siç e kemi traditën tonë të shkëlqyer.

Vendin tonë e ka bekuar Zoti me gjithë të mirat, ta shohim si amanet që duhet ta mbajmë siç i takon amanetit të ruhet.

Unë besoj se me ndihmën e Zotit ne do t’ia dalim ta bëjmë Shqipërinë më të mirë, për veten tonë dhe për fëmijët tanë.

E për ta bërë vendin më të mirë, kontributi parësorë është vendosja e një raporti të drejtë me të vërtetën dhe të drejtën nga secili prej nesh.

Të dashur qytetar,

ky vit shënon një ngjarje madhore për islamin dhe kombin shqiptar.

Komuniteti Mysliman i Shqipërisë shënon 100-vjetorin e themelimit të tij.

Ka qenë një rrugëtim i mundimshëm, por i bukur. Unë personalisht dhe institucioni që drejtoj, jemi krenarë për historinë tonë. Jemi krenarë për paraardhësit tanë në këtë shekull.
Ne i kemi dhënë dhe vazhdojmë t’i japim kësaj shoqërie, këtij kombi vlerat më të larta e më të sinqerta.

Falë besimtarëve dhe drejtuesve të besimeve në Shqipëri ne i kemi kontribuar këtij kombi një nga vlerat me të cilat krenohemi të gjithë, kudo, harmoninë dhe dialogun ndër fetar.

I tillë do të vazhdojë ky kontribut edhe në të ardhmen me lejen e Zotit.

Për të patur vazhdimësi kjo vlerë e komuniteteve fetare, duhet që çdo komponent i shoqërisë tonë të kujdeset për të mbrojtur meritën dhe ta shpërblejë atë kudo që ajo ndodhet.

Motra dhe vëllezër,

ta lusim Zotin që ky muaj që po lemë pas të na ketë bërë njerëz më të mirë.

Të na ketë bërë më të vëmendshëm ndaj të varfërve, ndaj kategorive të margjinalizuara të shoqërisë. Të jemi më të ndjeshëm dhe më solidarë me njëri-tjetrin.

Të kujdesemi për miredukimin e fëmijëve. Të shtrijmë dorë e mëshirës dhe kujdesit ndaj prindërve, fqinjëve, e cilitdo që ka nevojë për ne.

Zoti na pastë fal mëkatet në këtë muaj të faljes!

Zoti u bekoftë ju, familjet tuaja dhe kombin tonë!

Amin!

Makinat

TIRANË- Për shkak të numrit të madh të qytetarëve të cilët kanë ardhur edhe makina, mësohet se rruga e Durrësit është bllokuar totalisht, me besimtarët që fikin makinat dhe largohen në këmbë drejt sheshit 'Skëndërbej', aty po kryhet falja e namazit.

Sot besimtarët myslimanë kremtojnë një nga festat e tyre më të rëndësishme, atë të Fitër Bajramit. Pas një muaji agjërimi dhe sakrifice për hirë të Allahut, që është muaji i Ramazit, sot herët në mëngjes ata falin Bajramin./Dosja.al