Shpërthim me tritol pranë banesës së 60-vjeçarit në Tiranë, dëmtohet biznesi

Foto Ilustruese

TIRANË- 60-vjeçari që ka në pronësi banesën ku u vu tritol këtë mëngjes në rrugën “Siri Kodra” në kryeqytet, thotë për Top Channel se është hera e tretë që prona e tij sulmohet në këtë mënyrë. Në portën e banesës dy katëshe në pronësi të Remzi Ponarit shpërtheu një lëndë plasëse dhe për pasojë u dëmtuan xhamat e biznesit në katin e parë.

I pyetur nga gazetarja Anila Hoxha, Ponari hedh poshtë dyshimet se ngjarja ka ndodhur për shkak të konflikteve me qiramarrësin. Sipas tij, qëllimi i autorëve mund të jetë prishja e biznesit, ndërsa thotë se ngjarjen do ta ndjekë nga afër kur të kthehet në vend.

“Znj. Anila , unë pronën e kam timen e kam me dokumente të plota. Katin përdhe e kam dhënë me qira një biznesi përpunim xhami. Marrëdhëniet me qiramarrësin i kam më se normale. Është siç mora vesh, hera e tretë që hedhin lëndë plasëse. Mendoj se kanë qëllim prishjen e biznesit sepse nuk gjej shkaqe të tjera. Mendoj se organet e hetimit policor kanë pasur mundësi  ta zgjidhnin këtë nyjë, megjithatë unë ditën e shtunë kthehem dhe besoj se do të kemi të reja”, përgjigjet Ponari kërkesës së gazetares Hoxha.

Vetë 60-vjeçari ka qenë avokat i caktuar nga shteti në disa çështje të forta në Shqipëri. Në vendngjarje policia ka mbledhur një seri pamjesh nga kamerat e sigurisë dhe po punohet për identifikimin e autorit i cili është një i ri rreth 25 vjeç.

Marrë nga TopChannel

Foto ilustruese

TIRANË- Shpërthimi me tritol ka ndodhur në banesën dy katëshe të Remzi Ponarit. Kati i parë i cilli ishte kthyer në biznes ku tregtoheshin xhama, është dëmtuar i gjithi, njoftoi policia në orët e para të mëngjesit. 

Dyshohet se tritoli mund të jetë vendosur për motive që lidhen me aktivitetin e 60-vjeçarit. Ngjarja e rëndë ndodhi në orët e para të mëngjesit në rrugën 'Siri Kodra' në Tiranë. Policia ka nisur punën për të zbardhur të plotë ngjarjen dhe për të identifikuar autorët.

Policia

TIRANË- Pas denoncimit të qytetarëve (lexo këtu) policia e kryeqytetit ka konfirmuar shpërthimin me tritol që ndodhi në orët e para të mëngjesit në një banesë. Sipas forcave blu, ngjarja ka ndodhur në rrugën 'Siri Kodra', afër një banese dy katëshe. Për pasojë, nga shpërthimi i fuqishëm janë dëmtuar xhamat e katit të parë, i cili funksiononte si biznes. E gjithë banesa është në pronësi të 60-vjeçarit me inicialet R.P. Policia dhe grupi hetimor kanë nisur punën për të bërë zbardhjen e rrethanave të ngjarjes dhe identifikimin e autorëve. 

NJOFTIMI I POLICISË:

Me datë 24.08.2022, në orët e para të mëngjesit, në rrugën "Siri Kodra", afër një banese dy katëshe në pronësi të shtetasit R. P., 60 vjeç, dyshohet se është vendosur dhe ka shpërthyer lëndë plasëse. Si pasojë e shpërthimit janë dëmtuar xhamat e biznesit në katin e parë, që ndodhet poshtë banesës. Vijon puna nga grupi hetimor për zbardhjen e rrethanave të ngjarjes dhe identifikimin e kapjen e autorit.

Foto ilustruese

TIRANË- Banorët e lagjes “Siri Kodra” në Tiranë kanë raportuar se mbrëmjen e djeshme është vendosur një sasi tritoli në një banesë të zonës. Ata kanë ndarë për 'JOQ' pamjet nga momenti kur policia ka mbërritur pranë banesës dhe ndodhet me një person, që dyshohet se është i zoti i banesës.

“Ndjes per shqetsimin JOQ kaq vone por ju lutem nese mund ta publikoni po ndodh dicka tek rruga siri kodra prane nderteses Gorenje esht e 3-ta her per kte muaj qe ka shperthim si tritol edhe policia e shtetit vjen ben nje kontroll sa per sy e faqe dhe sna japin asnje pergjigje”- denoncon qytetari. 

Ndërkohë policia ende nuk ka dalë me një njoftim zyrtar për të bërë sqarimin e plotë të kësaj ngjarje që ka lënë banorët e zonës të shqetësuar.