Politike

Kitet për testimin e COVID-19/ PD: Edi Rama gënjeu për numrin e kiteve, e përgënjeshtroi edhe ministrja Manastirliu

8 Prill 2020, 09:47 Nga DOSJA
Kitet për testimin e COVID-19/ PD: Edi Rama gënjeu për numrin e

TIRANË– Partia Demokratike ka kërkuar sërish testim masiv nga qeveria për të identifikuar rastet e fshehura me koronavirus. Në një deklaratë për shtyp, ish-deputeti Bardh Spahia ka pretenduar se arsyeja përse kërkesa e PD nuk merret parasysh është se sistemi shëndetësor nuk ka kitet e testimit.

Spahia citoi kryeministrin Rama, i cili u shpreh se ISHP-ja mund të kryejë deri në 2 mijë teste në ditë, deklaratë e cila u përgënjeshtrua nga ministrja e Shëndetësisë Ogerta Manastirliu dhe Komiteti i Ekspertëve.

Manastirliu është shprehur se Shqipëria ka në dispozicion gjithsej 2 mijë kite testimi, ndërsa Albana Fico ka deklaruar se vendi mund të bëjë 200-500 testime bë ditë.

“Deklarata e tij se ne jemi të gatshëm të bëjmë 2 mijë teste në ditë, u përgënjeshtrua nga Ministrja e Shëndetësisë dhe nga vetë Komiteti i Ekspertëve të Edi Ramës. Partia Demokratike i bën thirrje qeverisë të rrisë numrin e testimeve mes qytetarëve,”-tha Spahia.

DEKLARATË E PARTISË DEMOKRATIKE:

Sot bëhet një muaj që kur në Shqipëri u zbulua rasti i parë me COVID 19. Ky muaj i vështirë ka provuar në mënyrë të përsëritur se qeveria ishte e papërgatitur për të përballuar krizën e krijuar nga koronavirusi. Shqipëria kishte pak kite për të testuar sa më shumë të dyshuar, sepse qeveria veproi me shumë vonesë për t’i siguruar, pavarësisht thirrjeve tona të hershme. Në përpjekje për të mbuluar dështimin në furnizimin e mjaftueshëm me kite për teste, Edi Rama e mbajti sekret sasinë e tyre dhe, kur u detyrua të fliste, ai gënjeu. Deklarata e tij se ne jemi të gatshëm të bëjmë 2 mijë teste në ditë, u përgënjeshtrua nga Ministrja e Shëndetësisë dhe nga vetë Komiteti i Ekspertëve të Edi Ramës. Të ndjekim për disa sekonda me zë dhe me figurë këtë mashtrim të rrezikshëm të Edi Ramës. Pra, e vërteta është se ne na kanë mbetur vetëm 2 mijë teste, se furnizimet i kemi kërkuar me vonesë, pas shpërthimit të virusit në vend dhe se na kanë gënjyer gjatë gjithë kohës për gjoja marrjen e masave.  E vërteta është se Shqipëria jo vetëm nuk ka një sasi të tillë për të kryer 2 mijë teste në ditë, siç thotë Edi Rama, por, për shkak të centralizimit nga qeveria në një laborator të vetëm, nuk ka as kapacitetet teknike për të bërë më shumë se 500 teste në ditë. E vërteta është se numri i pamjaftueshëm i testeve na ka detyruar që, deri javën e kaluar, të bëjmë mesatarisht, 50 teste në ditë, duke ulur në minimum mundësitë për të zbuluar raste apo vatra të reja infeksioni. Gënjeshtrat e Edi Ramës janë të rrezikshme. Numri i vogël i testimeve fsheh përhapjen reale të virusit. Sa më pak testime, aq më e pakët mundësia për të izoluar virusin dhe për të ndërprerë zinxhirin e përhapjes së tij. Me urimin që sasia e re e furnizimit me kite testuese të vijë sa më shpejt dhe duke falenderuar partnerët tanë për ndihmën e madhe që po na japin, Partia Demokratike i bën thirrje qeverisë të rrisë numrin e testimeve mes qytetarëve. Kështu do të dimë përmasën reale të dëmit të shkaktuar, të papenguar nga gënjeshtrat e kryeministrit dhe do të kuptojmë më mirë se kur mund të kthehemi në normalitet.

Që prej shfaqjes së dy rasteve të para me koronavirus në vend, PD-ja ka kërkuar testime masive dhe ka akuzaur qeverinë që nuk ka marrë masa për të përballuar situatën në vend. Rama i ka siguruar se të gjitha masat janë marrë dhe se strategjinë e testimeve e kanë në dorë ekspertët e fushës. Ndryshe nga PD-ja, mendon edhe presidenti Ilir Meta, i cili gjithashtu nuk ka kërkuar testime në masë të popullatës. 

(k.m/dosja.al)

1 vit nga zgjedhjet e 25 prillit si e shikoni gjendjen e vendit:

View Results

politike politike bardh spahia edi rama koronavirusi ne shqiperi testime masive bardh spahia edi rama koronavirusi ne shqiperi testime masive

Sondazh

Poll

Politike 8 Prill 2020, 08:17

TIRANË– Kuvendi i Shqipërisë vijon me punën pavarësishrt situatës së krijuar nga koronavirusi në vend. Komision i Ligjeve dje ka rrëzuar dy dekretet për kt...

MË SHUMË