Politike

Berisha: Thirrjet ‘Sali Berisha, Sali Berisha’ në stadiumin serb i motivuan lojtarët tanë për të fituar

Në një konferencë për mediat, Berisha u shpreh se stadiumi ku po zhvillohej ndeshja, sipas tij ishte i mbushur me ultranacionalistë të përzgjedhur nga Vuçiç.

17 Tetor 2025, 13:37 Nga E.d
Berisha: Thirrjet ‘Sali Berisha, Sali Berisha’ në stadiumin
Sali Berisha

TIRANË- Sali Berisha, Kreu i Partisë Demokratike i është përgjigjur deklaratës së djeshme nga Kuvendi të Kreut të Grupit Parlamentar të PS, Taulant Balla i cili theksoi se pas ndeshjes Shqipëri-Serbi në Leskovc, serbët thirrnin emrin e Berishës si fyerje. Berisha deklaroi sot nga selia blu se thirrjet "Sali Berisha, Sali Berisha", në stadiumin serb, motivuan lojtarët e kombëtares të fitonin ndeshjen.

Në një konferencë për mediat, Berisha u shpreh se stadiumi ku po zhvillohej ndeshja, sipas tij ishte i mbushur me ultranacionalistë të përzgjedhur nga Vuçiç. Kryedemokrati tha se ndeshja u fitua dhe për herë të parë Serbia humbi dhe mori atë që meritonte. Në fund Berisha tha se ekipi i kombëtares serbe, ishte një ndër ekipet më të dobëta.

"E dëgjuat ju vetë Taon? E vërteta është se në stadiumin e Leskovcit, i mbushur me ultranacionalistë të përzgjedhur nga Vuçiçi, për t’u dhënë zemër lojtarëve të vet, ka shpërthyer me histeri thirrjet Sali Berisha, Sali Berisha. Vetëm e vetëm që të motivonin lojtarët e ekipit kombëtar. Dhe çfarë thoshte ai? Serbët na fyejnë ne duke na thënë Sali Berisha. I shihni ju çfarë vasalësh janë këta? Tao thotë në parlament se serbët na fyejnë ne duke na thënë Sali Berisha.

E kuptoni se çfarë skllevërish janë këta, qenie të shpërfytyruara. Në fakt ndeshja u fitua dhe për herë të parë Serbia humbi, mori atë që meritonte në tokën e vet. Ai slogan në vend që të motivonte ekipin, motivoi kundërshtarët dhe aty morën një disfatë të turpshme. Le që ishin fare të dobët njëherë, ishte një ekip ndër më të dobëtit. Nuk shihej në fushë," tha Berisha./Dosja.al

sali berisha pd serbi

Sondazh

Poll