Bota

Akuzohet për udhëheqjen e një grushti shteti/ Ish-presidenti brazilian planifikonte të ikte në Argjentinë para gjyqit

Ata pretendojnë se të dy u përpoqën të ndërhynin në gjyqin që po zhvillohet aktualisht kundër Bolsonaros, ku akuzohet për udhëheqjen e një grushti shteti të tentuar pas humbjes së tij në zgjedhjet presidenciale të vitit 2022.

21 Gusht 2025, 22:08 Nga E. D
Akuzohet për udhëheqjen e një grushti shteti/ Ish-presidenti
Jair Bolsonaro

BRAZIL- Policia në Brazil ka akuzuar ish-presidentin Jair Bolsonaro, 70 vjeç, dhe djalin e tij 41-vjeçar Eduardo për pengim të drejtësisë. Ata pretendojnë se të dy u përpoqën të ndërhynin në gjyqin që po zhvillohet aktualisht kundër Bolsonaros, ku akuzohet për udhëheqjen e një grushti shteti të tentuar pas humbjes së tij në zgjedhjet presidenciale të vitit 2022, shkruan BBC. 

Policia thotë se ka gjetur një dokument në telefonin celular të Jair Bolsonaros, i cili sugjeron se ai planifikonte t'i shmangej procedurave penale duke kërkuar azil në Argjentinë. Ata gjithashtu akuzojnë Eduardo Bolsonaron për lobim në administratën Trump në emër të babait të tij gjë që ata thonë se çoi në vendosjen e tarifave ndëshkuese nga SHBA-të për mallrat braziliane.

Raporti policor prej 170 faqesh vjen më pak se dy javë para fillimit të fazës përfundimtare të gjyqit për grusht shteti dhe shton presionin mbi ish-udhëheqësin. Jair Bolsonaro mohon të ketë komplotuar për të përmbysur humbjen e tij në zgjedhjet e vitit 2022 ndaj rivalit të tij të majtë, Luiz Inácio Lula da Silva.

Por ai ka vënë në pikëpyetje drejtësinë e procedurave kundër tij, duke pretenduar se është shënjestër e një gjuetie shtrigash politike. Ai i tha agjencisë së lajmeve Reuters muajin e kaluar se nuk kishte asnjë dyshim se pesë gjyqtarët e Gjykatës së Lartë të ngarkuar me dhënien e vendimit kishin vendosur tashmë për dënimin e tij. Por në atë kohë, ai mohoi të kishte bërë ndonjëherë plane për t'iu shmangur gjyqit.

"Nuk e kam menduar kurrë të largohem nga vendi, kurrë", i tha ai Reuters, duke shtuar se besonte se akuzat për grusht shteti ishin të dizajnuara për ta eliminuar atë nga kandidimi për president në vitin 2026. Por në raportin e tyre të paraqitur të mërkurën, policia thotë se gjeti një letër draft në telefonin celular të Jair Bolsonaro-s, ku kërkonte azil politik në Argjentinë.

Letra prej 33 faqesh i ishte drejtuar drejtpërdrejt presidentit argjentinas Javier Milei, sipas raportit. Milei e ka dënuar persekutimin e Bolsonaros dhe shihet si një aleat politik i ish-liderit. Letra nuk ka datë, por policia thotë se është modifikuar për herë të fundit në telefon në shkurt të vitit 2024, pak pasi Bolsonaros iu desh t’ia dorëzonte pasaportën policisë.

Nuk është e qartë nëse drafti është dërguar ndonjëherë dhe një burim nga qeveria argjentinase i ka thënë Reuters se zyra e presidentit argjentinas nuk kishte marrë asnjë letër nga Bolsonaro. Por policia argumenton se drafti tregon qëllimin e Bolsonaros për t'i shpëtuar drejtësisë. Alexandre de Moraes, gjyqtari që mbikëqyr gjyqin e Bolsonaros, u ka dhënë avokatëve të ish-presidentit 48 orë për të dhënë një shpjegim për kërkesën e supozuar për azil.

Jair Bolsonaro është aktualisht nën arrest shtëpiak dhe i është ndaluar të postojë në mediat sociale dhe të kontaktojë djalin e tij Eduardo për shkelje të kufizimeve të gjykatës të vendosura ndaj tij. Raporti akuzon gjithashtu Eduardo Bolsonaro se po përpiqet të ndikojë në gjyqin e babait të tij duke lobuar administratën Trump për të ushtruar presion mbi qeverinë braziliane dhe Gjykatën Supreme.

Në korrik, Trump njoftoi se do të rriste tarifat për importet braziliane në 50%, duke përmendur trajtimin e Brazilit ndaj Jair Bolsonaros si shkak për rritjen. Përveç kësaj, Departamenti Amerikan i Shtetit u ndaloi tetë gjyqtarëve të Gjykatës Supreme brazilianë - përfshirë Alexandre de Moraes - të udhëtonin për në SHBA.

Eduardo Bolsonaro, i cili ndodhet në SHBA për gati gjashtë muaj, përdori rrjetet sociale të mërkurën për të mohuar akuzat kundër tij. Ai tha se veprimet e tij në SHBA nuk kishin pasur kurrë për qëllim të ndikonin në ndonjë procedurë gjyqësore në vazhdim në Brazil dhe se qëllimi i tij kishte qenë rivendosja e lirive individuale në vend.

jair bolsonaro

Sondazh

Poll

MË SHUMË