Aktualitet

Administrata Publike nën goditje: Nga hyrjet politike te drejtuesit, tek shuarja e statusit për inspektorët

Me vendimin për ristrukturimin e inspektorateve, shumë prej tyre po dalin nga statusi i nëpunësit civil dhe po kalojnë në marrëdhënie pune sipas Kodit të Punës, duke humbur kështu mbrojtjen ligjore, karrierën dhe pavarësinë funksionale.

25 Korrik 2025, 21:25 Nga Dosja.al
Administrata Publike nën goditje: Nga hyrjet politike te drejtuesit, tek
Foto

TIRANË- Dy vendime të fundit të Këshillit të Ministrave po e kthejnë reformën në administratën publike prapa, duke cenuar rëndë parimin e karrierës dhe profesionalizmit, si dhe duke hapur rrugën për politizim të mëtejshëm të shtetit.

Vendimi nr.110, datë 19.2.2025, i ndryshuar rishtas, hap sërish dyert për emërime nga jashtë shërbimit civil në pozicione drejtuese të mesme dhe të ulëta. Në ndryshimet e fundit të këtij vendimi, jo vetëm që shtohen pozicione për t’u zënë nga jashtë sistemit (si në Kryeministri), por edhe shfuqizohen disa vende të tjera pa ndonjë shpjegim publik. Ky është një tjetër shembull i mënyrës sesi ligji për nëpunësin civil po anashkalohet, ndërsa nëpunësit civilë me përvojë, që punojnë prej vitesh në administratë, pengohen të avancojnë në karrierë.

Sipas ligjit nr.152/2013 “Për nëpunësin civil”, hyrja nga jashtë në pozicione drejtuese duhet të jetë një përjashtim i arsyetuar, jo një praktikë e vazhdueshme. Megjithatë, qeveria po e përdor këtë nen si një kanal të rregullt për të futur njerëz jashtë sistemit, shpesh të lidhur me interesa politike. Ky zhvillim është në kundërshtim të hapur me Rekomandimet e Bashkimit Evropian, që kërkojnë një administratë publike profesionale, meritokratike dhe të depolitizuar.

Ndërkohë, një tjetër goditje më e thellë po i jepet shtyllës së zbatimit të ligjit në terren: inspektorëve të punës, shëndetësisë, mbrojtjes së konsumatorit, etj.. Me vendimin për ristrukturimin e inspektorateve, shumë prej tyre po dalin nga statusi i nëpunësit civil dhe po kalojnë në marrëdhënie pune sipas Kodit të Punës, duke humbur kështu mbrojtjen ligjore, karrierën dhe pavarësinë funksionale.

Ky ndryshim rrezikon të shkatërrojë bazën e kontrollit dhe inspektimit ligjor në sektorët më të ndjeshëm të jetës publike. Inspektorët e punës që mbrojnë të drejtat e punëtorëve, ata të sigurisë ushqimore që garantojnë sigurinë në treg, apo të tjerë që kontrollojnë ambientin, janë tashmë në rrezik të zëvendësohen nga staf jo i mbrojtur, më i prekshëm nga ndërhyrjet politike dhe më pak i motivuar për të ushtruar autoritet të pavarur.

Këto zhvillime jo vetëm që cënojnë themelet e shtetit të së drejtës dhe të administratës profesionale, por përbëjnë edhe një mesazh të rrezikshëm për partnerët ndërkombëtarë, në një kohë kur Shqipëria pretendon të hapë negociatat e kapitujve të rëndësishëm të integrimit në BE.

Përfundimisht, në vend që të forcohet shtylla profesionale e shtetit, qeveria po i hap rrugë emërimeve të përkohshme, jashtë kritereve të karrierës, dhe po godet funksionarët që ushtrojnë kontroll mbi ligjshmërinë në sektorë kyç. Ky nuk është një reformim i administratës, por një zbehje e funksioneve të saj, me pasoja serioze për mirëqeverisjen, llogaridhënien dhe shërbimin ndaj qytetarëve./ Dosja.al

administrata publike

Sondazh

Poll

MË SHUMË