Politike

Komisioni i Ligjeve/ Ndryshimet në buxhetin 2025, deputeti socialist drejtuar ministrit Malaj: Ka akesa nga policët që nuk janë paguar për orët shtesë, a do të ketë rritje page?

Deputeti socialist Denis Deliu e pyeti duke u ndalur te mundësia e rritjes së pagave për policët, Forcat e Armatosura dhe Gardën e Republikës duke argumentuar se ky adresim vjen si reagim ndaj ankesave të shumta.

23 Qershor 2025, 12:37 Nga M.B
Komisioni i Ligjeve/ Ndryshimet në buxhetin 2025, deputeti socialist
Petrit Malaj

TIRANA- Ministri i Financave, Petrit Malaj, ka prezantuar sot në Komisionin e Ligjeve ndryshimet në Aktin Normativ që lidhet me buxhetin e vitit 2025 teksa tha se ky ndryshim vjen në kuadër të nevojës për rishikimin e disa projekteve të domosdoshme. Sipas tij në total, fondi për alokim arrin në 11.8 miliardë lekë dhe bazohet në disa shtylla kryesore.

Gjatë prezantimit u tha se propozimi përmban rialokimin e këtyre 11.8 miliardë lekëve, duke synuar forcimin e kapaciteteve për sigurinë kibernetike dhe teknologjinë e informacionit në AKSH, si dhe rishpërndarjen e fondeve brenda ministrive.

Deputeti socialist Denis Deliu e pyeti duke u ndalur te mundësia e rritjes së pagave për policët, Forcat e Armatosura dhe Gardën e Republikës duke argumentuar se ky adresim vjen si reagim ndaj ankesave të shumta.

Pjesë nga diskutimi në Komision:

Malaj: Këto ndryshime u hartuan për të reflektuar disa zhvillime në buxhetin e shtetit për vitin 2025. Hartimi i këtij akti u krye pas analizës pesëmujore që Ministria e Financave i bëri të ardhurave dhe shpenzimeve. Nga kjo analizë rezultoi se kishte nevojë për ndryshime në buxhetin e vitit 2025, duke marrë në konsideratë ecurinë e projekteve deri në këtë fazë, si dhe nevojën për një përdorim sa më efikas të fondeve të alokuara për investimet publike. Kjo çoi në parashikimin e ri të disa parametrave buxhetorë, me synimin për t’i harmonizuar me zbatimin real të buxhetit të vitit 2025.

Siç është tashmë kushtetuese, rishikimi i buxhetit duhet të bëhet me akt normativ, si një instrument ligjor që vepron me forcë të menjëhershme. Kjo urgjencë buron nga nevoja për të siguruar përdorimin efikas të fondeve publike dhe rialokimin e menjëhershëm të tyre drejt atyre projekteve investimesh që kanë pasur një ecuri më të mirë. Në mënyrë të përmbledhur, përmes këtij Akti Normativ propozohet rialokimi i 11.8 miliardë lekëve, me fokus në forcimin e kapaciteteve për sigurinë kibernetike dhe teknologjinë e informacionit në AKSH, si dhe rishpërndarjen e fondeve brenda ministrive.

Deliu: Shoh këtu mbështetje për Ministrinë e Brendshme. Si anëtar i Komisionit të Sigurisë Kombëtare, kemi marrë ankesa nga punonjës të policisë të cilët nuk kanë marrë ende pagesat për orët shtesë, si dhe disa dieta e shpërblime. Në vijim të kësaj, dua të pyes nëse do të ketë një rritje page për Policinë e Shtetit, Forcat e Armatosura dhe Gardën e Republikës?

Malaj: Ashtu siç kemi sqaruar në relacionin që i kemi paraqitur Komisionit, nuk kemi dhënë fonde shtesë për nevojat që mund të kenë paraqitur disa prej ministrive. Ministrisë së Brendshme, në fakt, i janë alokuar disa fonde shtesë për Agjencinë e Pasurive të Sekuestruara dhe të Konfiskuara, si dhe për Gjendjen Civile, për të mbuluar detyrime të prapambetura. Për vitin 2025, nuk kemi parashikuar rritje page.

komisioni i ligjeve

Sondazh

Poll

MË SHUMË