Sport

Më shumë se 15.000 tifozë argjentinas do të ndalohen në Kupën e Botës për Klube!

Përpara Kupës së Botës për Klube, e cila fillon në qershor, ministrja e Sigurisë e Argjentinës, Patricia Bullrich, i ka dërguar ambasadës amerikane një listë me 15.000 tifozë të ndaluar nga stadiumet.

13 Maj 2025, 09:30 Nga DOSJA

Më shumë se 15.000 tifozë argjentinas do të ndalohen në

ARGJENTINE - Ministrja argjentinase e Sigurisë, Patricia Bullrich, i dorëzoi të hënën Ambasadës së SHBA-së në Buenos Aires një listë me 15.000 tifozë të dhunshëm të futbollit, të cilët do të ndalohen të hyjnë në stadiume gjatë Kupës së Botës për Klube.

Ky edicion i ri, i cili do të zhvillohet në tokën amerikane nga 14 qershori deri më 13 korrik, do të bashkojë klubet argjentinase Boca Juniors dhe River Plate, si dhe 30 ekipe të tjera nga e gjithë bota.

"Lista përfshin më shumë se 15.000 persona që do të ndalohen të hyjnë në stadiume. Për ne, kjo është jashtëzakonisht e rëndësishme, sepse asnjë person i dhunshëm që ka kryer një krim në stadiumet argjentinase, nuk do të jetë në gjendje të marrë pjesë në këtë ngjarje sportive", tha ministrja për shtypin.

Lista u përpilua duke përdorur programin "Tribuna Segura", një mjet që zbulon njerëzit e ndaluar nga stadiumet në Argjentinë. Që nga fillimi i saj, "Tribuna Segura" ka kontrolluar më shumë se 4 milionë njerëz në 1.328 ndeshje.

"Ne kemi zbuluar 1.166 persona që i nënshtrohen urdhër-arresteve dhe kemi lëshuar më shumë se 40 rezoluta administrative që kufizojnë aksesin e tyre në stadiume ", shtoi Patricia Bullrich.

B.T (Dosja.al)