Aktualitet

Nuk u ngrit komisioni për votimin e fshehtë, dështon seanca e 9-të e konstituimit të Kuvendit të Kosovës

Ndryshe nga herët e kaluara, nuk u propozua kandidati për kryetar të Kuvendit nga partia fituese e zgjedhjeve, Lëvizja Vetëvendosje.

1 Maj 2025, 10:56 Nga M.B
Nuk u ngrit komisioni për votimin e fshehtë, dështon seanca e
Kuvendi i Kosovës

KOSOVA- Deputetët e Kuvendit të Kosovës kanë dështuar ta konstituojnë Kuvendin e Kosovës të enjten, në përpjekjen e nëntë, pasi nuk kaloi propozimi i kryesuesit të seancës, Avni Dehari, për votim të fshehtë për kryeparlamentarin. Ndryshe nga herët e kaluara, nuk u propozua kandidati për kryetar të Kuvendit nga partia fituese e zgjedhjeve, Lëvizja Vetëvendosje.

Seanca konstituive ka nisur më 15 prill dhe në tetë seancat paraprake deputetët kanë arritur të kalojnë vetëm dy pikat e para të rendit të ditës – miratimin e raportit të Komisionit të përkohshëm për verifikimin e mandateve dhe betimin e deputetëve – por, kanë ngecur në pikën e tretë, atë të zgjedhjes së kreut të ri të organit legjislativ.

Kryetari i Partisë Demokratike të Kosovës (PDK), Memli Krasniqi, ka folur para mediave pas dështimit të përpjekjes së nëntë për konsistituimin e Kuvendit. Ai ka thënë se Lëvizja Vetëvendosje (LVV) e Albin Kurtit “ka vendosur ta vazhdojë talljen”, teksa ka thënë se me propozimin për ndërrim të formës së votimit LVV-ja ka bërë “shkelje të hapur kushtetuese”. Krasniqi ka përsëritur qëndrimin e partisë së tij kundër votimit të të propozuarës së LVV-së për kryetare të Kuvendit, Albulena Haxhiu.

“Nuk kalon Albulena Haxhiu dhe pikë”, është shprehur Krasniqi.

Ai ka pyetur se çfarë borxhi i ka Kurti Haxhiut që nuk po ndryshon emrin e kandidatit për kryetar të Kuvendit, siç kanë kërkuar partitë tjera. Krasniqi ka thënë se Kurti po e konsideron më të rëndësishme Haxhiun sesa Kuvendin e Kosovës./ REL

 

kosova

Sondazh

Poll

MË SHUMË