Bota

Tragjedia në klubin e natës në Santo Domingo, shkon në 226 numri i viktimave

Fatkeqësia, e cilësuar si tragjedia më e madhe e shekullit në Republikën Domenikane, tejkalon numrin e viktimave në zjarrin e vitit 2005 në një burg në pjesën lindore të vendit, kur humbën jetën 136 të burgosur.

13 Prill 2025, 08:09 Nga r.ll
Tragjedia në klubin e natës në Santo Domingo, shkon në 226
foto nga vendngjarja

REPUBLIKA DOMENIKANE- Numri i të vdekurve nga shembja e çatisë së një klubi në Santo Domingo ka shkuar në 226, ndërsa të gjithë trupat u janë dorëzuar familjarëve të viktimave.

Çatia në klubin e natës Jet Set u shemb mbrëmjen e 8 prillit, teksa ylli i muzikës merenge Ruby Perez ishte në skenë. Ai vetë humbi jetën kur ndodhi ngjarja e rëndë.

"Ka 221 vdekje në terren zero (vendi i tragjedisë) dhe katër nga spitalet," tha Ministri i Shëndetësisë Publike Victor Atala në një konferencë për shtyp dje në mëngjes. Një grua nga Kosta Rika ndërroi jetë nga plagët e marra më vonë në spital, duke e çuar numrin e të vdekurve në 226.

Fatkeqësia, e cilësuar si tragjedia më e madhe e shekullit në Republikën Domenikane, tejkalon numrin e viktimave në zjarrin e vitit 2005 në një burg në pjesën lindore të vendit, kur humbën jetën 136 të burgosur.

Ministri deklaroi gjithashtu se “të gjithë trupat u janë dorëzuar” familjarëve të viktimave, duke i dhënë fund pritjes së tyre të gjatë jashtë morgut. Që nga e marta, dhjetëra njerëz ishin mbledhur jashtë departamentit të mjekësisë ligjore. Dje, të shtunë, turma ishte zhdukur, sipas pamjeve të transmetuara nga rrjetet televizive.

Viktimat përfshijnë një çift francez me banim në vend dhe një italian. Uashingtoni, i cili i shprehu "ngushëllimet e sinqerta" presidentit Luis Abinader, njoftoi të premten se "disa qytetarë amerikanë" ishin në mesin e të vdekurve , pa dhënë një numër specifik.

tragjedia në santo domingo

Sondazh

Poll

MË SHUMË