Bota

Mbreti i Danimarkës dhe Macron, aleatë për Europën mes një "beteje" të heshtur me SHBA-në për Groenlandën

Mbreti dhe presidenti francez do të flasin në Forumin Ekonomik Franko-Danez. Ministrat e Jashtëm të Francës dhe Danimarkës do të nënshkruajnë një marrëveshje bashkëpunimi strategjik

31 Mars 2025, 21:46 Nga A.Ll
Mbreti i Danimarkës dhe Macron, aleatë për Europën mes
Pamje nga pritja në Pallatin Élysée nga Presidenti Emmanuel Macron dhe bashkëshortja e tij, Brigitte Macron

FRANCË - Mbreti i Danimarkës Frederick I dhe gruaja e tij, Mbretëresha Mary, filluan sot një vizitë zyrtare tre-ditore në Francë, e cila synon forcimin e bashkëpunimit dypalësh në fushën e mbrojtjes dhe ekonomisë, mes tensioneve mbi Groenlandën – një territor autonom danez që ka tërhequr interesin e administratës amerikane.

Pas një ceremonie zyrtare të mirëseardhjes në Pallatin e Invalidëve, çifti mbretëror u prit në Pallatin Élysée nga Presidenti Emmanuel Macron dhe bashkëshortja e tij, Brigitte Macron. Takimi u pasua nga një darkë shtetërore në nder të Mbretit Frederik dhe Mbretëreshës Mary.

Kjo është vizita e parë shtetërore e një monarku danez në Francë që nga viti 1978 dhe vjen pas vizitës së Presidentit Macron në Kopenhagë në vitin 2018.

Bashkëpunimi franko-danez dhe sfidat globale
Vizita zhvillohet në kuadrin e një partneriteti të fortë mes dy vendeve, të cilat ndajnë një vizion të përbashkët për forcimin e sovranitetit evropian, veçanërisht në sektorin e mbrojtjes dhe për mbështetjen e Ukrainës. Danimarka ka furnizuar Ukrainën me 19 armë të tipit Caesar, të prodhuara nga Franca, duke reflektuar angazhimin e përbashkët të të dy vendeve ndaj sigurisë evropiane.

Mbreti Frederik, i cili flet rrjedhshëm frëngjisht për shkak të origjinës franceze të babait të tij, ka ndërtuar një marrëdhënie të ngushtë me Francën gjatë viteve. Ky faktor ka ndihmuar në forcimin e lidhjeve mes dy vendeve në fusha të ndryshme strategjike.

Tensionet me SHBA-në dhe çështja e Groenlandës
Vizita vjen në një moment kritik për marrëdhëniet transatlantike, veçanërisht pasi Donald Trump u rikthye në Shtëpinë e Bardhë në janar dhe Danimarka pritet të marrë presidencën e radhës të Këshillit të Bashkimit Evropian në gjysmën e dytë të vitit 2025.

Tensionet me SHBA-në janë rritur pas vizitës së Zëvendëspresidentit të SHBA, J.D. Vance, në bazën ushtarake amerikane në Groenlandë. Gjatë vizitës së tij, ai kritikoi ashpër qeverinë daneze për mungesën e investimeve në sigurinë e këtij territori strategjik, duke e quajtur atë "një tokë të pabesueshme dhe të mrekullueshme" që kërkon më shumë përkushtim.

Marrëveshje strategjike dhe forumi ekonomik
Në këtë kontekst, ministrat e Jashtëm të Francës dhe Danimarkës do të nënshkruajnë nesër një marrëveshje strategjike bashkëpunimi, duke thelluar marrëdhëniet dypalëshe në fushat e sigurisë, ekonomisë dhe energjisë.

Mbreti Frederik dhe Presidenti Macron do të marrin pjesë në Forumin Ekonomik Franko-Danez, ku do të diskutohen mundësitë e reja të bashkëpunimit ekonomik, veçanërisht në fushën e shëndetësisë dhe tranzicionit ekologjik. Në këtë forum do të jenë të pranishëm përfaqësues të gjigantit farmaceutik danez Novo Nordisk, i cili ka disa impiante prodhimi në Francë, si dhe përfaqësues të rreth 50 kompanive të tjera daneze.

Vizita mbretërore synon gjithashtu të forcojë bashkëpunimet në fushat e kulturës, trashëgimisë kulturore dhe inovacionit, duke forcuar një partneritet të qëndrueshëm mes dy vendeve evropiane.

mbreti i danimarkës frederick i dhe gruaja e tij mbretëresha mary francë vizita

Sondazh

Poll

MË SHUMË