Sport

De Zerbi: "Trump tha se Rusia nuk e pushtoi Ukrainën. Por unë isha atje dhe e di të vërtetën"...

“Gjithmonë kam thënë që pas Marsejës nuk do të stërvis skuadra të tjera në Francë, por kjo nuk do të thotë se dua të largohem nesër”…

28 Shkurt 2025, 17:37 Nga DOSJA

De Zerbi: "Trump tha se Rusia nuk e pushtoi Ukrainën. Por unë

FRANCE - “Unë jam gjithmonë pranë Pablo Longoria, Fabrizio Ravanelli dhe Medhi Benatia, ata janë pjesë e familjes sime, ashtu si lojtarët e mi dhe të gjithë njerëzit në këtë klub.

Më vjen keq që nuk flas frëngjisht sepse do të doja shumë që fjalët e mia të transkriptoheshin sa më mirë për atë që mendoj për këto polemika. Kjo është hera e fundit që do të flas për arbitrat për sa kohë jam në këtë stol”.

Trajneri i Marsejës, italiani Roberto De Zerbi ka folur në një konferencë për shtyp, duke iu rikthyer polemikave të arbitrave që çuan në skualifikimin e madh të presidentit të klubit francez.

“Gjithmonë kam thënë se kam besuar në mirëbesimin e arbitrave, por për mendimin tim nuk ishte një arbitrim i qetë me disa vendime që rëndonin rezultatin.

Të gjitha incidentet e këtij viti, si përjashtimi i Maupay kundër Angers, dy përjashtimet e Cornelius, përjashtimi i Harit kundër PSG-së dhe përjashtimi i Balerdit kundër Lyonit, janë gabime shumë të rënda nga këndvështrimi im. Nëse dikush mendon se ato që them nuk janë të vërteta, ky është problemi i tij”.

De Zerbi më pas bën një ekskursus 'politik': "Këto ditë lexova se Trump tha se Rusia nuk e pushtoi Ukrainën, por unë isha në Ukrainë dhe e di të vërtetën, atëherë secili mund të mendojë çfarë të dojë dhe t'i shohë gjërat në mënyrën e vet".

Më pas, kishte hapësirë edhe për të ardhmen e tij: “Gjithmonë kam thënë që pas Marsejës nuk do të stërvis skuadra të tjera në Francë, por kjo nuk do të thotë se dua të largohem nesër, apo në fund të vitit, do të doja të qëndroja për dy, tre apo katër vjet, nuk e di”.

B.T (Dosja.al)