Aktualitet

Shkolla në Smollik të Bulqizës një godinë me dërrasa, pa tualet, pa energji dhe në mes të pyllit

Ky fshat me 50 familje ka 6 nxënës, të cilët bëjnë mësim në një godinë prej dërrasash, me kushte skandaloze.

22 Nëntor 2024, 21:34 Nga M.B
Shkolla në Smollik të Bulqizës një godinë me
Foto nga emisioni

BULQIZA- Fshati Smollik, në Njësinë Administrative Zerqan në Bashkinë e Bulqizës, nuk ka një godinë të mirëfilltë arsimore. Ky fshat me 50 familje ka 6 nxënës, të cilët bëjnë mësim në një godinë prej dërrasash, me kushte skandaloze. Kjo ndërtese ndodhet në mes të pemëve, në një vend larg fshatit dhe fëmijët kur shkojnë në shkollë rrezikohen edhe nga kafshët e egra. Rruga që këta fëmijë bëjnë çdo ditë për të marr dije është edhe më e keqe se një shteg dhishë.

Fiksi udhëtoi drejt këtij fshati të thellë. Banorët në këtë fshat merren me bujqësi dhe kanë mbetur vetëm 50 familje. Gjithsej në fshat janë edhe 6 fëmijë që ndjekin arsimin 9-vjeçar. Banorët ankohen për kushtet në të cilën ndodhet godina ku fëmijët marrin dije si dhe për rrugën që duhet të përshkrojnë për të shkuar në të ashtuquajturën shkollë, por që vetëm e tillë nuk mund të quhet.

Ndërtesa e modifikuar si shkollë është jashtë çdo kushti, pa ujë, pa energji, pa tualet. Pjesët e mureve të rëna janë munduar të mbyllen me dërrasa. Rruga që të çon tek ndërtesa është rrugë pa rrugë, pasi është një shteg me vështirësi kalimi për të rriturit e jo më për fëmijët.E gjitha kalon përmes pyllit gjë që e bën të rrezikshme edhe nga kafshët e egra. Për ta përshkruar këtë distancë fëmijët duan çdo ditë 30 minuta ecje në këmbë.

Fiksi u interesua pranë Bashkisë Bulqizë në lidhje me këtë problematikë. Mevlud Karaj Përgjegjës i Shërbimeve në Bashkinë e Bulqizës  shprehet për Fiksin se  bashkë me administratorin janë përpjekur për të gjetur një godinë më afër fshatit për ta kthyer në shkollë, por që pirat janë tepër të larta.

“Nuk mund ta paguajmë një shumë kaq të madhe sa na kërkojnë sepse ka rregulla të përcaktuara për qiratë. Jemi në tentativa për të gjetur një zgjidhjë, sepse aty nuk mund të ndërtojmë një banjë  sepse nuk çojmë dot bazën materiale, se  nuk ekziston as rruga”, shprehet z. Karaj. Ai gjithashtu citoi se janë në kërkim të një zgjidhjeje për këtë problematikë  të fshatit, pasi siç u faktua edhe më figurë nga Fiksi, pamjet flasin më shumë se fjalët./ Top Channel

bulqiza

Sondazh

Poll

MË SHUMË