Politike

Protesta brenda dhe jashtë Kuvendit, policia çon në SPAK shtatë deputetët e opozitës (EMRAT)

Në njoftimin e policisë thuhet se dje në sallën e seancës plenare deputetja Elda Hoti ka hedhur në drejtim të deputetëve socialistë një lëndë të lëngshme të paidentifikuar.

18 Tetor 2024, 11:21 Nga r.ll
Protesta brenda dhe jashtë Kuvendit, policia çon në SPAK
pamje nga seanca e djeshme

TIRANË- Opozita ka zhvilluar protestë ditën e djeshme si brenda dhe jashtë ambienteve të Kuvendit. Gjatë protestës ka patur përplasje mes deputetëve të opozitës dhe punonjësve të policisë. Si rezultat policia ka referuar materialet në SPAK në gjendje të lirë për shtatë deputetët e opozitës, Elda Hotin, Flamur Nokën, Bledion Nallbatin, Gazment Bardhin, Dashnor Sulën, Luan Baçin dhe Saimir Korreshin. 

Në njoftimin e policisë thuhet se dje në sallën e seancës plenare deputetja Elda Hoti ka hedhur në drejtim të deputetëve socialistë një lëndë të lëngshme të paidentifikuar. Hoti është shprehur se shishja e hedhur mbante parfum, ndërsa mazhoranca pretendon se ishte benzinë. Ndërkohë për Nokën, Bardhin, Nallbatin, Baçin, Sulën dhe Korreshin, thuhet se kanë kundërshtuar me dhunë punonjësit e policisë që ishin me shërbim. 

NJOFTIMI I POLICISË: 

Tiranë

Drejtoria Vendore e Policisë Tiranë në lidhje me tubimin e zhvilluar ditën e djeshme, në vijim të veprimeve hetimore të kryera ka referuar materialet në Prokurorinë e Posaçme Kundër Korrupsionit dhe Krimit të Organizuar në gjendje të lirë për shtetasit:

- E. H., 32 vjeçe, për veprën penale "Kanosja" dhe "Shkelja e rregullave mbi lëndët helmuese";
- F. N., 53 vjeç, B. N., 38 vjeç, G. B., 39 vjeç, D. S., 55 vjeç, L. B., 61 vjeç, dhe S. K., 43 vjeç, për veprën penale "Kundërshtimi i punonjësit të policisë së rendit publik".

Ditën e djeshme, në ambientet e sallës së seancave plenare të Kuvendit të Shqipërisë, shtetasja E. H., ka hedhur në drejtim të deputetëve një lëndë të lëngshme të paidentifikuar, ndërsa në hyrje të godinës së Kuvendit të Shqipërisë, shtetasit F. N., B. N., G. B., D. S., L. B., dhe S. K., kanë kundërshtuar me dhunë punonjësit e policisë të planëzuar me shërbim.

Materialet i kaluan Prokurorisë.

policia e tiranes

Sondazh

Poll

MË SHUMË