Bota

Boris Ruge tregon biseden me Vuçiç pasi i kërkoi përgjegjësi për sulmet ndaj ushtarëve të NATO-s në Kosovë: Do presim procesin e gjyqit

Në një intervistë për N1 në BeH, Ruge theksoi praninë dhe angazhimin e vazhdueshëm të NATO-s në rajon, duke thënë se Ballkani është në radarin e NATO-s dhe ne nuk po shkojmë askund.

22 Gusht 2024, 22:52 Nga I.A
Boris Ruge tregon biseden me Vuçiç pasi i kërkoi
Boris Ruge

SARAJEVË- Ndihmës Sekretari i Përgjithshëm i NATO-s për Çështjet Politike dhe Politikën e Sigurisë Boris Ruge së fundmi zhvilloi një turne në Ballkanin Perëndimor, ku si pjesë të vizitës kishte edhe Kosovën, përpos Bosnjën e Serbinë. Në një intervistë për N1 në BeH, Ruge theksoi praninë dhe angazhimin e vazhdueshëm të NATO-s në rajon, duke thënë se Ballkani është në radarin e NATO-s dhe ne nuk po shkojmë askund.

Ruge tha se qëllimi i vizitës së tij ishte të takohej me krerët politikë në Prishtinë, Sarajevë e Beograd, për të vlerësuar situatën politike dhe për të riafirmuar praninë dhe partneritetin e NATO-s në Kosovë, Bosnje dhe Hercegovinë dhe në Serbi.

“Dhuna në Kosovës në maj dhe shtator të vitit të kaluar, ishte pjesë e rëndësishme e bisedës që e pata me presidentin Vuçiç. Ne po kërkojmë përgjegjësi të plotë për sulmet ndaj ushtarëve tanë, për ngjarjet e shtatorit të vitit të kaluar në Banjskë. Kjo ishte një pikë që shefi im, Sekretari i Përgjithshëm Stoltenberg e ka bërë, dhe këtë ia përsërita presidentit Vuçiç. Kjo është diçka që duam t’i shkojmë në fund”, tha ai.

I pyetur se çfarë i ka thënë Vuçiç për çështjen e sulmeve ndaj ushtarëve të NATO-s në Kosovë, Ruge tha: Na tha se ne mund të presim të shohim vazhdimësi sa i përket procesit gjyqësor në Serbi”.

Zyrtari i lartë i NATO-s tha se mendimet e tij me të Vuçiç janë plotësisht të ndryshme për sa i përket Kosovës.

“Nuk janë krejtësisht divergjente. Unë vij këtu, përfaqësoj NATO, shefin tim, Sekretarin e Përgjithshëm, i parashtroj qëndrimet tona, dhe kjo është diçka që do ta mbajmë në agjendë. Kosova është e rëndësishme. Ende e kemi një operacion ushtarak me rreth 5 mijë ushtarë në Kosovë. Roli ynë është të garantojmë ambient të sigurt, të punojmë me Policinë e Kosovës, me EULEX-in, dhe kjo është ende një detyrë e rëndësishme që synojmë të përmbushim”, deklaroi Ruge.

Ai tha se tha se me Serbinë, NATO ka partneritet prej disa vitesh, por shtoi se duan që Serbia të luajë rol pozitiv edhe në Bosnje.

“NATO është këtu, është pjesë e këtij rajoni, e kemi prezencën në Bosnje, Kosovë, kemi marrëdhënie edhe me Serbinë, dhe po e përcjellim për së afërmi se çfarë po ndodhë këtu. Siç mund të shihni nga vizita ime, nga puna që po e bëjmë në selinë e NATO-s, Ballkani është në radarin tonë, jemi shumë të interesuar, kemi interesa në këtë pjesë të botës, dhe nuk do të shkojmë askund, do të jemi këtu që të punojmë me partnerët tonë dhe të kontribuojmë në sigurinë dhe stabilitetin në këtë rajon”, deklaroi Ruge.

boris ruge nato

Sondazh

Poll

MË SHUMË