Aktualitet

Ndarja nga jeta e Ismail Kadaresë, Kurti: Bota humbi shkrimtarin e saj më të madh, anija e romaneve të tij do të lundrojë pafundësisht

Kryeministri i Kosovës thotë se arti dhe kultura jonë i kanë borxh të pamatshëm oqeanit të mendjes së tij.

1 Korrik 2024, 11:27 Nga r.ll
Ndarja nga jeta e Ismail Kadaresë, Kurti: Bota humbi shkrimtarin e saj
ismail kadare

KOSOVË- Kryeministri i Kosovës, Albin Kurti ka reaguar për vdekjen e shkrimtarit më të madh shqiptar, Ismail Kadaresë. Përmes një postimi në Facebook, Kurti shkruan se bota humbi shkrimtarin e saj më të madh të gjallë. 

Kryeministri i Kosovës thotë se arti dhe kultura jonë i kanë borxh të pamatshëm oqeanit të mendjes së tij. Ai shprehet se romanet e Kadaresë do të jetojnë pafundësisht, për aq sa bota do të ketë lexues shqiptarë.

POSTIMI I PLOTË:

Ne humbëm shkrimtarin më të madh të të gjitha kohërave, bota humbi shkrimtarin e saj më të madh të gjallë. Porsa hymë në gjysmën e dytë të vitit 2024, Kadare mbylli sytë përgjithmonë. Por sytë tanë kanë parë e do të shohin shumë më mirë për shkak të imagjinatës dhe dijes së Ismail Kadaresë.

Kur ai mbyllte sytë në të gjallë të tij dhe mendohej për malet e Shqipërisë dhe greminat e historisë, teksa qëndiste mijëra faqe me shqipe të bukur si qiell, ne kolektivisht shikonim më qartë e dukeshim më mirë, mendonim më thellë e mësonim më shumë.

Arti dhe kultura jonë i kanë borxh të pamatshëm oqeanit të mendjes së tij. Anija e romaneve të Kadaresë do të lundrojë pafundësisht, për aq sa bota do të ketë lexues dhe shqipja shqiptarë.
Ngushëllime të gjithëve.

albin kurti ismail kadare

Sondazh

Poll

MË SHUMË