Bota

Vota e Malit të Zi kundër anëtarësimit të Kosovës në KiE, Gjukanoviç: Po bien maskat pro-Europës, por Kosovën e kemi njohur më 2008

Ai thotë se ky veprim, tregon qartë fillimin e heqjes së maskës europiane dhe shfaqjes së fytyrës së vërtetë antimalazeze.

24 Prill 2024, 14:10 Nga M.B

 

Vota e Malit të Zi kundër anëtarësimit të Kosovës
Milo Gjukanoviç

MALI I ZI- Ish-presidenti dhe kryeministri malazez, Milo Gjukanoviç në një intervistë, ka komentuar votën kundër të Malit të Zi për anëtarësimin e Kosovës në KiE. Ai thotë se ky veprim, tregon qartë fillimin e heqjes së maskës europiane dhe shfaqjes së fytyrës së vërtetë antimalazeze. I pyetur nëse pranimi i Kosovës në Këshillin e Europës dhe Rezoluta për Srebrenicën, e cila duhet të miratohet në OKB, është momenti kur të paktën një pjesë e qeverisë do të fillojë të heqë maskën evropiane, Gjukanoviç thotë se votimi në KiE tregon se nuk ka homogjenizim të vërtetë në radhët e krijuesve dhe zbatuesve të politikës shtetërore në Mal të Zi.

“Për më tepër, asnjëri prej tyre nuk kujdeset për interesat shtetërore të Malit të Zi. Sepse nëse do t’u interesonte, dhe po u interesonte marrëveshja e tyre e koalicionit, do të kujdeseshin për faktin që Mali i Zi e njohu Kosovën në 2008. Dhe do të kujdeseshin që në marrëveshjen e koalicionit të kenë deklaruar se do të ndjekin prioritetet e politikës së jashtme që përmban strategjia e zhvillimit shtetëror. Natyrisht, tashmë janë arritur disa çështje ku nuk është aq e lehtë të kamuflosh thelbin e dikujt anti-evropian dhe antimalazez”, tha Gjukanoviç.

Sipas ish-presidentit malazez, gjithashtu shqetësim mbetet neglizhenca që po i bëhet Rusisë që ka nxitur politikën më retrograde në rajon, përkatësisht nacionalizmin dhe projektet e mëdha shtetërore.

“Ballkani Perëndimor po merret me të njëjtat çështje që trajtonte në vitet ’90. Mbrojtja e anëtarëve të supozuar të rrezikuar të kombeve të caktuara jashtë kufijve të vendeve të origjinës, duke shkatërruar kështu sovranitetin e vendeve fqinje, duke prishur marrëdhëniet e fqinjësisë së mirë dhe në thelb duke rrezikuar stabilitetin, pra perspektivën evropiane të rajonit”, tha ai.

 

milo gjukanoviç

Sondazh

Poll

MË SHUMË