Bota

Sulmi në Banjskë, Kurti: Pas 30 javësh Prokuroria ende nuk ka ngritur aktakuzë ndaj Radoiçiç

Kurti gjatë fjalës së tij tha se edhe pas 30 javësh që Milan Radoiçiç ishte pjesë e këtij sulmi, ende nuk ka aktakuzë ndaj tij nga Prokuroria e Shtetit.

14 Prill 2024, 15:45 Nga N.F

Kurti

KOSOVË- Kryeministri i Kosovës, Albin Kurti në një deklaratë të lëshuar së fundmi ka folur sërish për sulmin terrorist të 24 shtatorit që ndodhi në Banjskë, ku mbeti i vrarë rreshteri Afrim Bunjaku. Kurti gjatë fjalës së tij tha se edhe pas 30 javësh që Milan Radoiçiç ishte pjesë e këtij sulmi, ende nuk ka aktakuzë ndaj tij nga Prokuroria e Shtetit.

“Sot po hymë në javën e 30-të prej kur kryekrimineli Milan Radoiçiq, i sanksionuar nga Shtetet e Bashkuara dhe Mbretëria e Bashkuar, ende nuk ka aktakuzë nga Prokuroria e Shtetit për sulmin terrorist në të cilin u vra rreshteri Afrim Bunjaku, sulm terrorist për të cilin ai pranoi publikisht pjesëmarrjen dhe autorësinë. Edhe java e tretë po të ishte pa aktakuzë do të duhej të problematizohej, lëre më java e 30 në të cilën hyjmë sot”, tha Kurti.

Kryeministri i Kosovës këto komente i bëri në mbledhjen e Këshillit të Përgjithshëm të Lëvizjes Vetëvendosje. Kurti ka folur edhe për çështjen e anëtarësimit të Kosovës në Këshillin e Evropës, ndërsa ka shtuar se më 16 prill është votimi më i rëndësishëm për këtë proces.

“Sot gjendemi në një situatë shumë më të favorshme. Raporti dhe opinioni i znj.Bakojanis njeh plotësimin e të gjitha parakushteve dhe qartë tregon se zotimet e tjera të Kosovës duhet të përmbushen pas anëtarësimit. Më 16 prill do ta kemi votimin më të rëndësishëm në procesin e anëtarësimit në KiE. Asambleja Parlamentare pritet ta miratojë opinionin e znj.Bakojanis, i cili rekomandon anëtarësimin e plotë të Kosovës pa asnjë parakusht shtesë dhe pa fusnotë”, shtoi ai.

Kurti theksoi se në kohën kur ka kërcënime të sigurisë nga fqinji verior, Kosova është përgjigjur me dyfishim të buxhetit për ushtri dhe trefishim për buxhetin për armatim. Ndërsa shtoi se në veri është ulur ilegaliteti dhe është shtuar ligjshmëria dhe siguria duke mbyllur 27 rrugë ilegale, shkatërruar nëntë laboratorë droge, të kriptovalutave dhe depo të armatimit, dhe janë ngritur nëntë stacione policore për mbikëqyrje dhe kontroll të kufirit.

“Në kohën kur kemi luftë në Evropë, dhe kërcënime të sigurisë nga fqinji veriorë, jemi përgjigjur me dyfishim të buxhetit për ushtri dhe trefishim për buxhetin për armatim. Blemë dronët bajraktar dhe prokuruam reketët anti-tankë. Ndërkaq, në kazerma ka mbi 1852 ushtarë më shumë, të cilëve do t’i bashkëngjiten sivjet edhe 600 rekrut të rijnë. Në veri të vendit tonë është ulur ilegaliteti dhe është shtuar ligjshmëria dhe siguria. Janë mbyllur 27 rrugë ilegale dhe janë shkatërruar nëntë laboratorë droge atje, gjashtë të kriptovalutave dhe katër depo të armatimit. Për të rritur sigurinë, janë ngritur nëntë stacione policore për mbikëqyrje dhe kontroll të kufirit”, ka theksuar Kurti.

sulmi ne banjske kurti radoicic