Sport

Uzuni, një nga asetet e Granadës, por që sot është me gjysmë çmimi!

Rikthimi i Granadës në Kategorinë e Dytë do ta ulë ndjeshëm çmimin e Myrto Uzunit, klauzola e largimit që shkon nga 25 në 12 milionë euro.

13 Prill 2024, 10:00 Nga DOSJA
Uzuni, një nga asetet e Granadës, por që sot është me

SPANJE - Rënia nga La Liga e skuadrës së futbollistit të kombëtares shqiptare Myrto Uzuni, Granada, mbetet thjeshtë për tu zyrtarizuar, por me sa duket do të sjellë edhe pasoja të shumta në klub. Goditja ekonomike do të jetë e konsiderueshme dhe një numër i mirë çështjesh sportive do të hapen për t’u zgjidhur. Mes tyre, ajo e Myrto Uzunit. Sulmuesi i Kombëtares shqiptare është një nga shtyllat e skuadrës, i cili në këtë sezon ka arritur të shënojë nëntë gola dhe një asistim, ndërkohë me këto rezultate çmimi i tij do të ketë një rënie të konsiderueshme. Thënë më saktë, klauzola e largimit të tij do të shkojë nga 25 në 12 milionë euro.

Myrto është një nga pasuritë e mëdha të klubit spanjoll. Që nga ardhja e tij në “Los Carmenes”, ai ka arritur më shumë se rekorde të konsiderueshme dhe është bërë një futbollist shumë i dëshirueshëm në treg. Vlera e tij është trefishuar që kur ka veshur fanellën e Granadës, ku sipas “Transfermarkt” ka shkuar nga 3 në 10 milionë euro. 33 golat dhe 7 asistimet që ai ka grumbulluar në pak më shumë sesa dy vite në Granada kanë kontribuar në këtë.

Ulja e klauzolës në 12 milionë e bën atë një mundësi të mirë për shumë klube që tashmë janë interesuar për sulmuesin, si në La Liga, ashtu edhe në vende të tjera si Italia dhe Gjermania. Uzuni ka kontratë me Granadën deri në vitin 2027, prandaj opsionet që ai të largohet janë të paguhet klauzola ose të arrijë marrëveshje me Granadën. Largimi i tij i mundshëm, pa dyshim, do të jetë një nga temat më të rëndësishme të verës në klub.

Mbetet të shihet se çfarë qëndrimi do të marrë klubi dhe cili është vullneti i lojtarit, i cili me siguri do të ketë oferta. Nëse Granada kërkon të fitojë para kur të përfundojë sezoni, Uzuni do të jetë një nga asetet e tij më të mira për të marrë një transfertë të mirë, me të cilën do të fillojë të formojë një projekt të ri në Kategorinë e Dytë spanjolle.

B.T (Dosja.al)

Sondazh

Poll

MË SHUMË