Bota

Yulia Navalnaya drejtuar Perëndimit: Mos i njihni zgjedhjet ruse të marsit

Navalnaya përdori një video-mesazh nga jashtë të hënën për t'u bërë thirrje mbështetësve që të kundërshtojnë Putinin me tërbim më të madh se kurrë dhe ta çlirojnë Rusinë nga ajo që ajo e karakterizoi si një elitë të korruptuar të "banditëve me uniformë, hajdutëve dhe vrasësve".

20 Shkurt 2024, 13:49 Nga M.B

Yulia Navalnaya

MOSKË- Julia Navalnaya, e veja e liderit të opozitës ruse, Alexei Navalny, i ka kërkuar Bashkimit Evropian që të mos i njohë zgjedhjet ruse të marsit, të cilat është pothuajse e sigurt që do t'i japin presidentit Vladimir Putin një mandat tjetër 6-vjeçar. Navalnaya përdori një video-mesazh nga jashtë të hënën për t'u bërë thirrje mbështetësve që të kundërshtojnë Putinin me tërbim më të madh se kurrë dhe ta çlirojnë Rusinë nga ajo që ajo e karakterizoi si një elitë të korruptuar të "banditëve me uniformë, hajdutëve dhe vrasësve".

"Mos i njihni këto zgjedhje," u tha Navalnaya ministrave të jashtëm të Bashkimit Evropian në një takim në Bruksel të hënën, sipas një transkripti të dhënë të martën nga një zëdhënëse.

"Një president që vrau kundërshtarin e tij kryesor politik nuk mund të jetë legjitim nga përkufizimi," tha Navalnaya.

Navalnaya ka akuzuar Putinin për vrasjen e burrit të saj dhe tha se provat do të sigurohen së shpejti. Udhëheqësit perëndimorë, përfshirë presidentin amerikan Joe Biden, kanë fajësuar Putinin për vdekjen dhe kanë paralajmëruar pasojat. Putin nuk ka komentuar ende në publik për vdekjen e Navalny. Kremlini ka mohuar përfshirjen dhe tha se pretendimet perëndimore se Putin ishte përgjegjës janë krejtësisht të papranueshme.

Sondazhet tregojnë se Putin, 71-vjeç, ka një vlerësim mbi 80% përpara zgjedhjeve presidenciale të 15-17 marsit, në të cilat tre kandidatë të vegjël po e sfidojnë atë. Me mbështetjen e plotë të shtetit rus, mediave shtetërore dhe pothuajse asnjë mospajtim publik kryesor, ai është i sigurt se do të fitojë, raporton Reuters.

julia navalnaya