Bota

Guterres: Nëntë anëtarë të stafit të UNRWA-s u pushuan nga puna pas akuzave për përfshirje në sulmin e 7 tetorit

Ai u kërkoi vendeve, megjithatë, të vazhdojnë ndihmën financiare për UNRWA që mbështet 2 milionë palestinezë që varen nga ndihma kritike për mbijetesën e përditshme, duke paralajmëruar se financimi aktual i agjencisë nuk do ta lejojë atë të përmbushë të gjitha kërkesat për t'i mbështetur ata në shkurt.

28 Janar 2024, 08:20 Nga r.ll
Guterres: Nëntë anëtarë të stafit të UNRWA-s u
antonio guterres

SHBA- Nga 12 anëtarët e stafit të Agjencisë së Kombeve të Bashkuara për Ndihmën dhe Punën për Refugjatët Palestinezë në Lindjen e Afërt (UNRWA) që dyshohet se janë përfshirë në sulmin vdekjeprurës të Hamasit të 7 tetorit në Izrael, nëntë janë pushuar nga puna, një i vrarë dhe identitetet e dy të tjerëve janë "duke u hetuar”. Lajmin e dha Sekretari i Përgjithshëm i OKB-së, António Guterres.

“Kombet e Bashkuara po ndërmarrin veprime të shpejta pas akuzave jashtëzakonisht serioze kundër disa anëtarëve të stafit të Agjencisë së OKB-së për Ndihmë dhe Punë (UNRWA),” tha Guterres të dielën, duke shtuar se organi mbikëqyrës i OKB-së ka nisur tashmë një hetim dhe një rishikim i pavarur është në pritje.

"Çdo punonjës i OKB-së i përfshirë në akte terrori do të mbahet përgjegjës, duke përfshirë ndjekjen penale," tha Sekretari i Përgjithshëm, sipas CNN.

Ai u kërkoi vendeve, megjithatë, të vazhdojnë ndihmën financiare për UNRWA që mbështet 2 milionë palestinezë që varen nga ndihma kritike për mbijetesën e përditshme, duke paralajmëruar se financimi aktual i agjencisë nuk do ta lejojë atë të përmbushë të gjitha kërkesat për t'i mbështetur ata në shkurt.

Në vazhdën e akuzave kundër UNRWA-së, nëntë vende deri më tani kanë ndërprerë fondet për agjencinë kryesore të OKB-së në Gaza.

“Ndërsa i kuptoj shqetësimet e tyre – unë vetë u tmerrova nga këto akuza – u bëj thirrje me forcë qeverive që kanë pezulluar kontributet e tyre për të garantuar, të paktën, vazhdimësinë e operacioneve të UNRWA-s”, tha Guterres.

"Aktet e supozuara të neveritshme të këtyre anëtarëve të stafit duhet të kenë pasoja. Por dhjetëra mijëra burra dhe gra që punojnë për UNRWA, shumë në disa nga situatat më të rrezikshme për punonjësit humanitar, nuk duhet të penalizohen. Nevojat e rënda të të dëshpëruarve popullatat që u shërbejnë duhet të plotësohen”, tha ai.

antonio guterres lufta izrael-palestine

Sondazh

Poll

MË SHUMË