Sport

Laporta “sulmon” Realin: "Ajo që ndodhi kundër Almerias, është e turpshme"

“Mund të kishim rikuperuar pikë nga Real Madridi, por nuk u bë e mundur për shkak të vendimeve të arbitrit dhe VAR”

23 Janar 2024, 08:00 Nga DOSJA

Laporta “sulmon” Realin: "Ajo që ndodhi kundër

SPANJE - Presidenti i Barcelonës, Joan Laporta, nga skena e "Mundo Deportivo Grand Gala" hyri direkt në polemikat e arbitrazhit të Real Madrid-Almeria, ndeshje e fituar nga skuadra madrilene 3-2, me të paktën tre vendime të diskutueshme (përfshi rastin për të përjashtuar Vinicius, i cili më pas shënoi 3-2 me një prekje të mundshme të krahut) marrë pas konsultimit me VAR, duke e cilësuar atë që ndodhi në “Santiago Bernabeu”, si të turpshme.

“Mendoj se ekipi i arbitrave duhet t'i përgjigjet një sërë presionesh që kanë ndodhur gjatë gjithë sezonit dhe nëse nuk na përgjigjen, na bëjnë shumë të pakëndshëm, - shpjegon Laporta. - Mund të kishim rikuperuar pikë nga Real Madridi, por nuk u bë e mundur për shkak të vendimeve të arbitrit dhe VAR. Ajo që pamë në “Bernabeu” është një turp”.

Më pas Laporta fokusohet te momenti te “Blaugrana” pas fitores ndaj Betisit: “Skuadra po përmirësohet, ata ndihen më të fortë dhe më të sigurt, ka më shumë unitet në dhomat e zhveshjes, po rikuperojmë edhe të lënduarit, - vijon numri një i “Blaugranas”, duke thënë se është i bindur se mund të sjellë disa trofe në shtëpi këtë sezon. - Jam shumë optimist sepse shoh se si skuadra po lufton ditë pas dite për të qëndruar në garë në të gjitha garat dhe për të provuar të fitojë".

B.T (Dosja.al)