Aktualitet

Festa për fitoren e Kristjan Shkrelit i shkon keq! Policia identifikon 27-vjeçaren në Vaun e Dejës, nis procedimin ndaj saj

Ndaj 27-vjeçares ka nisur procedimi në gjendje të lirë për veprën penale “Prishja e qetësisë publike”.

17 Maj 2023, 13:58 Nga A.B
Festa për fitoren e Kristjan Shkrelit i shkon keq! Policia identifikon
Gruaja ne video

TIRANË- Policia ka identifikuar dhe ka nisur procedimin në gjendje të lirë ndaj një 27-vjeçareje, e cila u shfaq duke qëlluar me armë zjarri pas fitores së Kristjan Shkrelit në Vaun e Dejës. Forcat blu bëjnë të ditur se gruaja me inicialet A. K. ka qëlluar në ajër, me armë imituese të zhurmës së armës së zjarrit.

Ndaj 27-vjeçares ka nisur procedimi në gjendje të lirë për veprën penale “Prishja e qetësisë publike”. Po ashtu, u sekuestrua në cilësinë e provës materiale, arma imituese e zhurmës së armës së zjarrit. 

NJOFTIMI I POLICISË:

Në lidhje me një video të publikuar në rrjete sociale, në të cilën shfaqet një shtetase duke qëlluar me armë, në ajër, ju bëjmë me dije se: Menjëherë pas publikimit të kësaj video-je, specialistët për Hetimin e Krimit të DVP Shkodër kanë kryer verifikimet, me qëllim zbardhjen dhe dokumentimin e plotë ligjor të këtij rasti. Nga verifikimet, është identifikuar shtetasja A. K. e cila ka qëlluar në ajër, me armë imituese të zhurmës së armës së zjarrit.

Për këtë rast u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Shkodër, ku nisi procedimi në gjendje të lirë për shtetasen A. K., 27 vjeçe, banuese në Vaun e Dejës, për veprën penale “Prishja e qetësisë publike”.

Gjithashtu, u sekuestrua në cilësinë e provës materiale, arma imituese e zhurmës së armës së zjarrit. Drejtoria Vendore e Policisë Shkodër falënderon median dhe qytetarët për rastet e denoncuara, si dhe i fton që të denoncojnë në numrin pa pagesë 112, çdo rast paligjshmërie, në cilëndo formë të shfaqjes së tyre.

Kujtojmë se Bashkia e Vaut të Dejës do të drejtohet nga Kristian Shkreli. Partia Socialiste ka grumbulluar më shumë vota, kundrejt koalicionit “Bashkë Fitojmë” dhe Partisë Demokratike. Kandidati i PS ka marrë 55.48 % të votave, Zef Hila i “Bashkë Fitojmë” ka marrë 38.17 %, ndërsa Partia Demokratike me kandidate Klomentina Drini ka marrë vetëm 6.35 %./Dosja.al

vau i dejes kristjan shkreli

Sondazh

Poll

MË SHUMË