Bota

Agresioni rus/ BE planifikon të dërgojë një milion predha artilerie në Ukrainë

Ndërkohë, Polonia, Estonia, Letonia, Lituania, Finlanda dhe Rumania po bëjnë presion për një premtim konkret për furnizimin me plumba në Ukrainë.

17 Mars 2023, 15:04 Nga a.l
Agresioni rus/ BE planifikon të dërgojë një milion predha
Predha

UKRAINË- BE-ja ka hartuar një plan për të mbështetur ofensivën verore të Forcave të Armatosura të Ukrainës, duke furnizuar vendin e sulmuar nga Rusia me një milion fishekë artilerie deri në fund të vitit. Siç raportojnë mediat e huaja, strategjia është përgatitur me iniciativën e Estonisë dhe duhet të miratohet nga Këshilli Evropian, i planifikuar në Bruksel më 23 dhe 24 mars. Draft plani thekson se krerët e shteteve dhe qeverive të vendeve anëtare të BE-së mirëpresin lehtësimin e furnizimit të menjëhershëm të municioneve për Ukrainën, përfshirë përmes prokurimit të përbashkët, me qëllim të dorëzimit të një milion municionesh artilerie deri në fund të 2023. 

Ndërkohë, Polonia, Estonia, Letonia, Lituania, Finlanda dhe Rumania po bëjnë presion për një premtim konkret për furnizimin me plumba në Ukrainë. Franca ka sinjalizuar mbështetjen e saj, ndërkohë që Gjermania është ende duke vlerësuar nismën. Situata ushtarake në ish-republikën sovjetike dhe konteksti politik po shqetësojnë gjithnjë e më shumë diplomatët e BE-së.

Nëpërmjet mobilizimit të pjesshëm, Rusia ka ngritur 300 trupa të tjera, duke stabilizuar kështu frontin. Betejat e shkatërrimit në Ukrainën lindore janë një barrë për të dyja palët ndërluftuese. Megjithatë, ndërsa Moska po humbet "kryesisht rekrutët", ukrainasit e rënë janë kryesisht veteranë të sprovuar. Prandaj, në BE ka dyshime se kundërofensiva e planifikuar nga Ukraina për pranverë dhe verë do të jetë në gjendje ta shtyjë ushtrinë ruse nga territoret nën kontrollin e saj. Mungesa e municioneve e përkeqëson situatën: ish-republika sovjetike duhet të racionojë predha artilerie, sepse përdor shumë më tepër sesa mund të prodhojnë Evropa dhe Shtetet e Bashkuara. 

Shtetet anëtare kanë kërkuar prej kohësh jashtë Evropës për të mbuluar nevojat e Ukrainës për municion, por ngurrojnë. Për shembull, Koreja e Jugut ka rezerva të konsiderueshme prej municionesh 155 mm, të cilat vendit të sulmuar nga Rusia i nevojiten për armët që ka marrë nga Perëndimi. Megjithatë, përballë kërcënimit që paraqet Koreja e Veriut, Seuli heziton të furnizojë këto predha. 

lufta ukraine-rusi

Sondazh

Poll

MË SHUMË