Aktualitet

Mediat italiane: Jugu i Shqipërisë, Maldivet dhe Karaibet e përballueshme!

154 kilometrat e vijës bregdetare, që shtrihet nga Vlora në veri deri në Ksamil përshkruhet si vendi ideal për pushime dhe me kosto të ulët për italianët.

19 Shkurt 2023, 20:46 Nga F.M
Mediat italiane: Jugu i Shqipërisë, Maldivet dhe Karaibet e
Shqipëri

TIRANË- Agjensia Italiane e Turizmit “Si viaggia” ka botuar një artikull ku flet për bukuritë shqiptare. Në artikullin e botuar, thuhet se Shqipëria mund të cilësohet si destinacioni i ëndrrave për 2023. 154 kilometrat e vijës bregdetare, që shtrihet nga Vlora në veri deri në Ksamil përshkruhet si vendi ideal për pushime dhe me kosto të ulët për italianët.

“Kopshti i Parajsës, një Eden autentik për ata që duan të kalojnë një pushim të këndshëm buzë detit në Evropë dhe në të njëjtën kohë të gjenden në atmosferën ëndërrimtare të Maldiveve dhe Karaibeve,”- thuhet ndër të tjera në artikull.

Artikulli:

Nëse mendja tashmë fluturon drejt verës dhe pushimeve relaksuese e argëtuese në plazh mes diellit e zhytjes në ujëra të pastër kristal, 2023 ka rezervuar një destinacion ëndrrash ku shkëmbinjtë, ujërat blu dhe bruz e malet e thepisura ndjekin njëri-tjetrin.

Po flasim për Rivierën Shqiptare, 154 kilometra brez i ngushtë bregdetar me hijeshi të sigurt që shtrihet nga Vlora në veri deri në Ksamil në jug, vetëm pak orë nga Italia dhe ideale për qëndrime me kosto të ulët.

Maldivet e reja të Evropës

Bregdeti jugor i Shqipërisë është një Eden autentik për ata që duan të kalojnë një pushim të këndshëm buzë detit në Evropë dhe në të njëjtën kohë të gjenden në atmosferën ëndërrimtare të Maldiveve dhe Karaibeve. Pamjet janë spektakolare, plazhet për të gjitha shijet, shkëmbore, ranore, të izoluara, guraleca, të pacënuara, ujërat e thella dhe shpellat ruajnë mbetjet parahistorike.

Por kjo nuk është e gjitha: përveç plazheve dhe detit, Shqipëria ofron mundësinë për të zbuluar dhe njohur nga afër fshatrat e lashta mesjetare, qytetet e gjalla, kishat dhe kështjellat.

Riviera Shqiptare ka pamje nga deti Jon, si Kroacia dhe Greqia, por bukuria kombinon gjithashtu çmimet e përballueshme dhe distancën nga turizmi masiv.

Më të mirat e mesit të verës 2023

Një nga destinacionet e tjera më të preferuara është gadishulli i Karaburunit, një magji pranë Vlorës.

E arritshme vetëm nga deti, gadishulli ofron perla të pakrahasueshme si Kepi i Gjuhëzës (Capo Linguetta), me një bregdet të pandotur dhe shpella të mrekullueshme, ndër të cilat përmenden Shpella e Haxhi Aliut.

Një cep tjetër i parajsës në gadishull është Gjiri i Gramës, një "shenjtore e detit", muret shkëmbore të të cilit ruajnë shkrimet e marinarëve të lashtë grekë si dhe një nga plazhet më magjepsëse në Shqipëri, me rërë të bardhë dhe natyrë që të lë pa frymë .

Qyteti i Himarës përqafohet nga një shtrirje e egër bregdeti që arrin të mbajë të pandryshuar vendet përrallore si Gjiri i Llamanit ku kodrat e gjelbra bashkohen me blunë e detit dhe plazhin e Potamit.

E pamundur të mos qëndrosh në Borsh, i cili, me 6 kilometra plazh, është i përsosur për rigjenerimin e shëtitjeve buzë detit mes aromës së agrumeve dhe pemëve të ullirit.

Fshati piktoresk i Dhërmiut, ku deti është i veshur me një mijë nuanca blu dhe plazhi verbon me guralecë të bardhë të përzier me rërë të imët.

Çfarë mund të themi, në fakt, për arkipelagun e Ksamilit me plazhet si të Karaibeve dhe ujërat transparente, ishujt e pabanuar të cilët janë një himn i vërtetë relaksimi?

Dhe pastaj, por jo më pak e rëndësishme, parqet kombëtare. Në rrethin e Vlorës vlen të shihet Parku Kombëtar i Llogarasë, ku mes fushave të gjera dhe shkëmbinjve të lartë spikasin pikat panoramike më të pabesueshme të Shqipërisë: nga qafa e Qezarit, vështrimi humbet duke admiruar gjirin e Orikumit, Karaburunin. Për dashamirët e historisë dhe arkeologjisë, nuk mund të mungojë Parku Kombëtar i Butrintit, një vend i Trashëgimisë Botërore të UNESCO-s që nga viti 2005, një nga vendet më prestigjioze arkeologjike në vend.

turizmi ne shqiperi si viaggia

Sondazh

Poll

MË SHUMË