Aktualitet

Arrestohet Sekretari i Ministrisë së Financave dhe dy drejtorët, dëmshpërblyen disa herë qytetarin për një godinë

Thana mori paratë në vitin 2015, por në 2022, totalisht jashtë ligjit, u krye rivlerësimi dhe me firmën e Gjokutajt, në shtator të vitit 2022, Thanës dhe motrës së tij iu kaluan 480 milionë lekë të tjera, duke i sjellë shtetit akoma më shumë dëme.

11 Janar 2023, 16:28 Nga F.M
Arrestohet Sekretari i Ministrisë së Financave dhe dy drejtorët,
Arlind Gjokutaj

TIRANË- Sekretari i përgjithshëm i Ministrisë së Financave Arlind Gjokutaj, së bashku me dy drejtorë të këtij institucioni janë vënë në pranga pasi akuzohen se kanë ndihmuar personin e identifikuar si Ilir Thana që të merrte kompensimin për privatizimin e një ndërmarrjeje shtetërore pavarësisht se ishte paguar dhe herë tjetër.

Bëhet fjalë për një magazinë që sipas Prokurorisë i është shitur Thanës për 1 milionë lekë nga nga drejtoria e shërbimit qeveritar në prill të vitit 1992, së bashku me një truall. Por tre vjet më vonë, komisioni i kthimit e kompesimit të pronave ia ktheu ndërtesën ish-pronarëve, një vendim i cili u mbështet edhe nga gjykata që urdhëroi kthimin e parave që blerësi kishte harxhuar në atë kohë, të konvertuara me indeksin e rritjes së çmimeve.

Kështu, Thana mori paratë në vitin 2015, por në 2022, totalisht jashtë ligjit, u krye rivlerësimi dhe me firmën e Gjokutajt, në shtator të vitit 2022, Thanës dhe motrës së tij iu kaluan 480 milionë lekë të tjera, duke i sjellë shtetit akoma më shumë dëme.

Më datë 21 dhjetor 2022, Prokuroria njoftoi se kishte arrestuar Thanën e kishte vënë në sekuestro 22 milionë lekë, por dëmi i shkaktuar ndaj shtetit, kapte vlerën e 1 milion e 200 mijë eurove, duke përllogaritur kalimet e herëpashershme. Thana është ndihmuar për mashtrimin nga Gjokutaj dhe dy drejtorë të tjerë, të cilëve ende nuk u janë zbardhur emrat, ndërsa bëhet me dije se nga ana e prokurorisë janë vënë nën hetim edhe përmbarues. Të tre zyrtarët akuzohen për 'shpërdorim detyre'.

Arlind Gjokutaj u emërua Sekretar i Përgjithshëm i Ministrisë së Financave dhe Ekonomisë në tetor 2021.

ilir thana arlind gjokutaj mashtrimi ne ministrine e financave

Sondazh

Poll

MË SHUMË