Aktualitet

Cili është plani me pesë pika i Rishi Sunak për imigracionin e paligjshëm dhe pse ai synon shqiptarët?

Më shumë se një e treta e njerëzve që kaluan Kanalin për në Mbretërinë e Bashkuar në nëntë muajt e parë të vitit ishin nga Shqipëria, sipas shifrave të qeverisë.

13 Dhjetor 2022, 21:28 Nga F.M
Cili është plani me pesë pika i Rishi Sunak për imigracionin
Foto Ilustruese

BRITANI E MADHE- Kryeministri Rishi Sunak ka shpalosur një plan të ri me pesë pika për të trajtuar emigracionin e paligjshëm që synon veçanërisht njerëzit që vijnë nga Shqipëria. Rishi Sunak i tha Commons të martën se situata ka kapur kulmin dhe se sistemi nuk është i drejtë.

Më shumë se 44,700 njerëz kanë arritur në Mbretërinë e Bashkuar duke kaluar Kanalin me varka të vogla këtë vit, tregon analiza e Sky News. Sunak tha se shqiptarët përbënin më shumë se një të tretën e të ardhurve në nëntë muajt e parë të vitit, ose 33,000, krahasuar me 3% vitin e kaluar.

Muajin e kaluar, qeveria zbuloi një sërë masash të përbashkëta me Francën për të ndihmuar në monitorimin e kalimeve me gomone. Sunak tha se shpresonte që së bashku të dy grupet e planeve do të ndihmonin për të pastruar prapambetjen e kërkesave për azil deri në fund të vitit të ardhshëm.

Por, cili është plani me pesë pika?

1. Komanda e gomoneve

Do të ngrihet një komandë e re operacionale e përhershme e unifikuar e gomoneve, e cila do të kombinojë personelin ushtarak, aftësinë civile dhe Agjencinë Kombëtare të Krimit (NCA). Ajo do të rekrutojë 700 persona në staf dhe do të dyfishojë fondet e saj për trajtimin e krimit të organizuar të imigracionit në Evropë. Zoti Sunak thotë se policimi i Kanalit është "shumë i fragmentuar" dhe komanda e re do t'i mundësojë stafit të koordinojë më mirë inteligjencën dhe zbatimin.

2. Fokusimi në zbatim

Komanda e re do të lejojë oficerët e imigracionit të përqendrohen vetëm në zbatimin - duke rritur kapacitetin e punës në bastisjen e objekteve të paligjshme të biznesit me më shumë se 50%, thotë zoti Sunak. Shpërndarja e të dhënave me agjencitë përkatëse gjithashtu do të fillojë sërish për të goditur migrantët që punojnë ilegalisht.

3. Nuk ka më hotele

Qeveria do të ndalojë përdorimin e hoteleve për të strehuar azilkërkuesit sa më shumë që të jetë e mundur. Në vend të tyre do të përdoren parqe pushimi të pashfrytëzuara, objekte ushtarake të tepërta dhe sallat bosh universitare, me hapësirë ​​për 10,000 njerëz.

4. Më shumë punonjës

Numri i punonjësve të rasteve të azilit do të dyfishohet për të trefishuar produktivitetin, thotë Sunak. Stafi do të ndahet sipas kombësisë dhe procesi i aplikimit do të jetë me më pak intervista dhe dokumente për të reduktuar ngarkesën aktuale. Sunak thotë se më shumë se 100 mijë raste presin për më shumë se një vit dhe ai shpreson se do t'i ketë mbyllur deri në fund të 2023.

5. Shqipëria konsiderohet 'vend i sigurt'

Një "marrëveshje dhe qasje e re" është rënë dakord me zyrtarët shqiptarë, përfshirë kryeministrin Edi Rama. Ai përfshin oficerë të forcave kufitare që do të jenë në aeroportin e Tiranës për herë të parë për të ndaluar njerëzit që përpiqen të shkojnë ilegalisht në MB. Shqipëria është një vend i sigurt, që do të thotë se "shumica e pretendimeve" do të refuzohen dhe mijëra do të kthehen me "fluturime javore" në muajt në vijim derisa "të gjithë shqiptarët të jenë larguar". Rreth 400 specialistë të rinj do të punojnë për përshpejtimin e aplikimeve shqiptare.

Marrë dhe përshtatur nga SkyNews

shqiptaret ne britani rishi sunak edi rama

Sondazh

Poll

MË SHUMË